Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 603 Hüküm no: 978 Orijinal metin no: [111b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Yakub’un Süleyman’a olan borcundan kalan miktarını da ödemesi Maʻrûz; Derûn-ı arzuhâlde mezkûr Süleyman nâm kimesne sâhib-i arzuhâl el-Hâc Yakub nâm kimesne ile terâfuʻlarında mezbûr el-Hâc Yakub’un yedimde olan işbu deyn temessükü mantûku üzere istidâne ve kabz eylediği dört yüz guruş hakkımdan bâkī kalan üç yüz guruş ile ribhden bâkī kırk guruş zimmetinde kalmağla taleb ederim dedikde mezbûr el-Hâc Yakub cevâbında müddeʻî-i mezbûr Süleyman meblâğ-ı deyn-i mezbûr üzerime devr-i şerʻî ile ilzâm-ı ribh etmeksizin târîh-i temessükden beri bilâ-devr-i murâbaha düyûnundan bi’d-defâʻat iki yüz elli beş guruş ahz u kabz etmişdir asl-ı mezbûrun ol mikdârına mahsûb olunması fetvâ-yı şerîfe mûcebince matlûbumdur deyicek müddeʻî-i mezbûr Süleyman dahi temessük târîhinden beri bilâ-devr-i şerʻî murâbaha deyü yüz otuz beş guruş kabzı ikrârıyla kezâlik bilâ-devr-i şerʻî yüz yirmi guruş kabzını ikrârı lede’t-tezkiye şehâdetleri makbûle olan dört nefer şuhûd-ı udûlden Hâfız Süleyman Efendi b. Mustafa, İsmail b. Ali ve Salih b. Ahmed ve Hasan b. Mehmed nâm kimesneler şehâdetleriyle sâbit cemʻan iki yüz elli beş guruş olmak üzere kabzı şerʻan sâbit olmağın meblâğ-ı makbûz-ı mezbûr ribâ olup asl-ı mala zam olunmak emr-i meşrûʻ olmağla müddeʻî-i mezbûrun bi-tarîkı’r-ribâ ahz eylediği meblâğ-ı mezbûr iki yüz elli beş guruş asl-ı maldan müddeʻâsı olan üç yüz guruşun iki yüz elli beş guruşuna takās olunup ve bilâ-devr mütâlebesi olan kırk guruş ribh daʻvâsıyla muʻârazadan menʻ olundukdan sonra asl-ı maldan bâkī kalan kırk beş guruşu müddeʻî-i mezbûr Süleyman’a edâ ve teslîm etmek üzere mezbûr el-Hâc Yakub’a tenbîh-birle tescîl olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sânî ve’l-ışrîn min-şehri Rebîʻi’l-âhir li-sene isneyn ve sittin ve miʼe ve elf.