Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 605 Hüküm no: 983 Orijinal metin no: [112a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb Hatun’un kocası Mehmed Beşe’den boşanmadığının tespit olunduğu Maʻrûz; Derûn-ı arzuhâlde mezkûrü’l-ism Mehmed Beşe nâm kimesne sâhibe-i arzuhâl Zeyneb Hatun ile Çarşamba günü dîvân-ı âlîde ba‘dehû Eyüb mahkemesinde meclis-i şerʻde terâfuʻlarında Havâss-ı refîʻa kazâsı muzâfâtından Çekmece-i sagīr nâhiyesine tâbiʻ Tarakatya nâm karye sâkinlerinden olup vilâyet-i Rumeli’nde hâlâ Selanik kazâsında sâkin İmam Hasan Efendi b. Mustafa’nın merkūm Zeyneb Hatun zevce-i menkûhası olmağla merkūm İmam Hasan Efendi bin yüz altmış iki senesi Muharremi’l-harâm’da sû-i hâlini işitmekle zevcesi mezbûre Zeyneb Hatun’u talâk-ı bâyin ile tatlîk ve bana mektûb irsâl edip tarafından talâkı isbât ve edâ-yı mehre beni vekîl eyledi deyü merkūm Mehmed Beşe’nin eylediği daʻvâsı şerʻan sahîha olmayıp mezbûre Zeyneb Hatun dahi talâkı münkire olup hakkında vukūʻ-ı talâk sâbit olmamağla alâ-hâlihâ terk olunup mezbûre Zeyneb Hatun’a taʻarruz etmemek üzere merkūm Mehmed Beşe’ye tenbîh olunduğu tescîl olunup mübâşirleri Mehmed Çavuş kulları iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’s-sâbiʻ min-şehri Cemâziyelevvel li-sene isneyn ve sittin ve miʼe ve elf.