Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 606 Hüküm no: 985 Orijinal metin no: [112a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın vefât eden İbrahim b. Ali’ye olan borcunu vârislerine ödemesi Maʻrûz-ı dâʻî-i Devlet-i aliyyeleridir ki; Medîne-i Eyüb’de Evlice Baba Mahallesiʼnde sâkin iken bundan akdem fevt olan İbrahim b. Ali’nin verâseti vâlidesi Hatice Hatun ile sulbî kebîr oğlu Süleyman ve sulbiye-i kebîre kızı Zeyneb Hatun ve sulbiye sagīre kızları Şerife Rukiye ve Şerife Habibe’ye baʻde’l-inhisâr sagīretân-ı mezbûretânın vâlideleri ve tesviye-i umûrlarına kıbel-i şerʻden mansûbe vasîleri olan Hatice nâm hatun meclis-i şerʻde müteveffâ-i mezbûrun er karındaşı bâʻisü’l-iʻlâm Mustafa nâm kimesneden müteveffâ-i merkūm İbrahim hâl-i hayâtında senin baʻzı husûsuna bi-şartü’r-rücûʻ emrinle kendi malından altmış guruş sarf edip ol cihetden zimmetinde altmış guruş hakkı vardır deyü daʻvâ ve merkūm Mustafa cevâbında müteveffâ-i mezbûr İbrahim benim husûsuma emrimle yalnız malından bi-şartü’r-rücûʻ on guruş sarf edip on guruşdan ziyâdeye emretmedim deyip emr-i ziyâdeyi inkâr etdikde müddeʻiye-i merkūme Hatice’den müddeʻâsına muvâfık beyyine taleb olundukda ityân-ı beyyineden izhâr-ı acz etmekle mezbûr Mustafa’ya cihet-i mezkûreden müteveffâ-i mezbûra on guruşdan ziyâde deyni olmadığına yemîn verilip müddeʻiye-i mezbûre Hatice bilâ-beyyine ziyâde daʻvâsıyla muʻârazadan menʻ olunup ve merkūm Mustafa ikrârıyla sâbit olan on guruşu müteveffânın veresesine edâya tenbîh olunduğu huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fi’l-yevmi’l-hâmis min-şehri Cemâziyelevvel li-sene isneyn ve sittin ve miʼe ve elf.