Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 607 Hüküm no: 987 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. II. Bayezid Evkâfıʼna tâbi Subaşılık mukataası gelirlerini toplaması için Bostancı Mehmed Haseki’nin görevlendirildiği Vech-i tahrîr-i hurûf budur ki; Cennet-mekân firdevs-âşiyân merhûm ve mağfûrun-leh Sultan Bâyezid Han-ı velî −tâbe serâhu− hazretlerinin İstanbul’da vâkiʻ Câmiʻ-i şerîf ve imâret-i âmireleri evkāf-ı şerîfi mukātaʻalarından Bâb-ı geç ile Kule-i heft beyninde vâkiʻ subaşılık mukātaʻasını işbu bin yüz altmış iki senesi Martı ibtidâsından sene-i mezbûr Şubatı gāyetine değin zabt eylemek üzere mâl-ı kadîmî üzere işbu hâfızü’t-temessük Bostanî-i hâssa Mehmed Haseki tâlib ve ragıb olmağla mâl-ı kadîmîsi olan meblâğ-ı mezbûru ber-vech-i peşin taraf-ı vakf-ı şerîfe edâ ve teslîm etmekle tevliyetim hasebiyle zabtına izin verildi. İnşâallâhu teʻâlâ Mart hulûlünde mukātaʻa-yı mezbûru zabt ü rabt eyleyip hâsıl olan avâidât ve rüsûmâtı sinîn-i sâbıkālarda ne vechile zabt edegelmişler ise mûmâ-ileyh dahi ol vechile zabt u rabt eyleyip âhardan ferd mâniʻ ve müzâhim olmamak içün işbu varak ketb olunup yedine verildi. el-Hâc Abdullah Mütevellî-i Vakf-ı Sultan Bâyezid Han-ı velî