Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 608 Hüküm no: 988 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani’nin eski borçlarını ödediği Ahmed’in dükkânını tekrar kirâladığı Maʻrûz-ı dâʻî-i Devlet-i aliyyeleridir ki; Sâhib-i arzuhâl Ahmed nâm kimesne bakkal tâifesinden derûn-ı arzuhâlde mastûrü’l-ism Bakkāl Yani nâm zimmî muvâcehesinde bâ-hüccet-i şerʻiyye müstakillen mülküm olan medîne-i Eyüb’de Çömlekciler sûkunda Tuba fırını karşısında olan bakkal dükkânımın işbu mesfûr Yani müsteciri olup müddet-i maʻlûmede iki bin beş yüz yirmi para ücret-i müctemiʻayı vermemekle meblâğ-ı mezbûru taleb ederim deyü eylediği daʻvâ-yı mezbûresini mesfûr Yani zimmî baʻde’l-inkâr bâ-vesâtet-i müslihîn müddeʻî-i mezbûr Ahmed müddeʻâsı olan meblâğ-ı mezbûr mütâlebesinden meccânen mesfûr Yani’nin zimmetini ibrâ-i âmm ile ibrâ ve iskāt etdikden sonra müddeʻî-i mezbûr Ahmed müstakillen mülkü olan bir bâb bakkal dükkânını kethüdâ ve ustaları maʻrifetiyle târîh-i iʻlâmdan beher şehr otuzar paraya olmak üzere mesfûr Bakkāl Yani zimmîye îcâr ve teslîm ol dahi ber-minvâl-i meşrûh istîcâr ve tesellüm ve kabûl ve beher şehr tamamında otuzar para ücreti bilâ-nizâʻ edâya taʻahhüd-birle beynlerin tevfîk ve katʻ-ı nizâʻ eyledikleri baʻde’t-tescîl mübâşiri çavuş kulları iltimâsıyla huzûr-ı âlîlerine iʻlâm olundu. Fî 21 Rebîʻülevvel sene 1162