Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 608 Hüküm no: 989 Orijinal metin no: [112b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal dükkânı kirâcısı Yani’nin Rukiye Hatun’a olan borcunu ödemesi Maʻrûz; Bâʻisetü’l-iʻlâm Rukiye nâm hatunun zevci ve zikr-i âtî husûsda vekîli el-Hâc Mehmed nâm kimesne bakkal tâifesinden Yani nâm zimmî muvâcehesinde işbu merkūm Yani’nin beher şehr altışar guruş ücret ile taht-ı icâresinde olan Tuba fırını karşısında dört kepenek bir aded bakkal dükkânı müteveffâ olan el-Hâc Mehmed’in üç nefer evlâdları zevcem müvekkile kızı Rukiye ve kızı Emine ve sulbî oğlu Ahmed’in intikāl-ı âdiye binâʼen ale’s-seviyye tasarruflarında olmağla ücret-i mezkûreden kızı müvekkilem mezbûre Rukiye hissesine âid olan beher şehr iki guruşunu müstecir-i mesfûr Yani zimmîden bi’l-vekâle iddiʻâ etdikde müstecir-i merkūm Yani ber-vech-i muharrer ikrâr ve icâre-i mezbûreden beher şehr müvekkile-i mezbûre Rukiye hissesine iktizâ eden iki guruş beher şehr tamamında edâ ve teslîme müteʻahhid olup iltimâslarıyla Eyüb mahkemesinde tescîl olunduğu huzûr-ı âlîlerine iʻlâm olundu. Fermân hazret-i veliyyü’l-emrindir. Fî 20 min-Rebîʻülevvel sene 1162