Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 609 Hüküm no: 990 Orijinal metin no: [112b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. II. Bayezid Evkafı’dan Haslar mukātaʻası kalemlerinden Silivri, Küçükçekmece ve Vidos kalemlerinin vergilerini toplaması için el-Hâc Mehmed’in görevlendirildiği Vech-i tahrî-i hurûf budur ki; Cennet-mekân firdevs-âşiyân merhûm ve mağfûrun-leh Sultan Bâyezid-i velî −tâbe serâhu− hazretlerinin İstanbul’da vâkiʻ Câmiʻ-i şerîf ve maʻbed-i latîf ve imâret-i âmireleri evkāfından Haslar ve tevâbiʻî mukātaʻası aklâmından Silivri perâkendesi ve tevâbiʻi kurâları ve Çekmece-i sagīr ve tevâbiʻi kurâları ve Vidos ve tevâbiʻi kurâları nâmûn kalemleri işbu bin yüz altmış iki senesi Mart ibtidâsından sene-i mezbûr Şubatı gāyetine değin zabt u rabt eylemek üzere işbu hâfızü’t-temessük kıdvetü’l-emâsil ve’l-akrân el-Hâc Mehmed Ağa tâlib ve râgıb olup beş bin iki yüz yetmiş beş guruşa deruhde ve kabûl etmeğin zabt u rabtına izin verildi. Bi-avnillâhi teʻâlâ zamânı hulûlünde karye-i mezbûrları hizmetleri vaktinde vâkiʻ olan mahsûlâtından hâsıl olan aʻşâr-ı şerʻiyye ve rüsûm-ı örfiyesin ve yâve ve kaçgun ve kul ve câriye ve müjdegânesi ve mâl-ı gāʼib ve mâl-ı mefkūd ve beytülmâl-ı âmme ve hâssa ve resm-i arûsâne ve öşr-i kovan ve öşr-i bostan ve resm-i tapu-yı zemîn ve mukātaʻat-ı zemîn ve çayır ve ispençe ve sâire cüzʼî ve küllî rüsûmât-ı hukūkātın sinîn-i sâbıkālarda ne vechile zabt u rabt edegelmişler ise mûmâ-ileyh dahi ol vechile zabt u rabt ve ahz u kabz edip evkāf-ı selâtîn-i izâm mefrûzu’l-kalem ve maktûʻu’l-kıdem min-külli’l-vücûh serbest olmağla umûr-ı serbestiyesine taraf-ı âhardan ferd ü vâhid mâniʻ ve müzâhim olmamak içün işbu hurûf li-ecli’t-temessük ketb ve serbestiyet üzere zabt u rabt eylemek içün tahrîr ve yedine verildi. Tahrîren fî-târîhi’l-mezbûr Bende: el-Hâc İbrahim Teberdâr-ı Saray-ı atîk-i maʻmûre