Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 609 Hüküm no: 991 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Difteros v. Vasil’in kötü davranışlarından dolayı komşularının şikâyette bulundukları Maʻrûz; Medîne-i Ebâ Eyüb Ensârî havâlîsinde Topçular Mahallesi İmamı el-Hâc Mehmed Efendi ve Müezzini Bektaş ve Abdi Usta ve cemâʻat-i Müslimîn’den Mehter Ali b. Receb ve İbrahim Beşe b. Hüseyin ve el-Hâc İbrahim b. Ömer ve Molla Mustafa b. Osman ve Feyzullah Beşe b. Ali ve Mehmed b. Mustafa ve Ali b. Abdullah nâm kimesneler meclis-i şerʻde Vâlidesarayı’nda meʼmûr <> haseki kulları maʻrifetiyle mahalle-i mezbûrede vâkiʻ bahçenin müsteciri bahçıvan tâifesinden ihzâr olunan Difteros v. Vasil nâm zimmî muvâcehesinde bundan akdem mesfûr Difteros zimmî kendi hâlinde olmayıp bazılarının ıyâllerine fesâd kasdında olduğu vechile sû-i hâli maʻlûm olmağla kendi hâlinde olmak üzere birkaç defʻa tenbîh etmişler iken mütenebbih olmayıp mahallede mütemekkine hâzıratü bi’l-meclis olan Fotine Nasrâniye ile ihtilât ve târîh-i iʻlâmdan bir gün mukaddem fesâd zuʻmuyla merkūme Nasrâniye’nin menziline duhûl etmekle ahz olunup hâlâ zimmî-i mesfûrun etvâr ve efʻâlinden hoşnûd değilleriz deyü sû-i hareketini muvâcehesinde her birleri ihbâr ve iştikâ eyledikleri iltimâslarıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 5 Rebîʻülevvel sene 1162