Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 612 Hüküm no: 996 Orijinal metin no: [113a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Arakil’in kefîl olduğu Maʻrûz; Mahmiye-i İstanbul’da Zindânkapısı dâhilinde Laz Ahmed Hanı’nda mütemekkin sarraf tâifesinden işbu hâmilü’l-iʻlâm Noradik nâm zimmî Vâlidesarayı’ndan meʼmûr taʻyîn olunan haseki mübâşeretiyle Eyüb mahkemesinde ihzâr olunan Harto v. Panayot ve Tolo v. Mihal muvâcehelerinde birbirlerinin emr ve kefâletiyle bâ-temessük ve hâric ez-temessük altı yüz on guruş mesfûrân Harto ve Tolo zimmetlerinde olan hakkımı taleb ederim deyü baʻde’d-daʻvâ mesfûrân Harto ve Tolo zimmîler ber-vech-i muharrer ikrâr ve iʻtirâf etmeleriyle edâsıyla mesfûrân zimmîler ilzâm olunup tescîl ve iʻlâm olundukdan sonra Sarraf Arakil zimmî meclis-i şerʻde meblâğ-ı deyn-i mezbûru mesfûr Harto ve Tolo edâ eylemezler ise bi’l-emr ve’l-kabûl kefâlet-i sahîha-i şerʻiyye ile meblâğ-ı mezbûr altı yüz on guruşu müddeʻî-i merkūm Noradik zimmîye edâya kefîl ve zâmin oldum deyü baʻde’l-ikrâr ve tescîl, bi’l-iltimâs huzûr-ı âlîlerine iʻlâm olundu. Fî 10 M sene 1162