Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 612 Hüküm no: 997 Orijinal metin no: [113b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gedik anlaşmazlığının sulh ile bitirildiği Maʻrûz; Bahçıvân tâifesinden Yuvan v. Topiko nâm zimmî Havâss-ı refîʻa kazâsında Topçular kurbünde Bayrampaşa nâm mahalde iki kıtʻa bahçelerin hâlâ müstecirleri olup derûnunda eşcâr-ı mağrûse ve sebzevâta ale’l-iştirâk şirâʼen vâzıʻu’l-yed olan Nikola v. Anaştaş ve şerîki Kiryako v. Yani muvâcehelerinde sarraf tâifesinden işbu hâmilü’l-iʻlâm Kazer v. Artin zimmî hâzır olduğu hâlde zikr olunan bahçelerde terbiye ile hâsıl eşcâr-ı maʻlûme ve sebzevâtdan gedik <> iʻtibârıyla nısf-ı şâyiʻimi mesfûr Sarraf Kazer zimmî fuzûlî zabt ve mesfûrân zimmîlere beyʻ etmiş baʻde’s-suâl hisse-i maʻlûmeden kasr-ı yedlerine tenbîh olunmak taleb ederim deyü iddiʻâ eylediğimde bâyiʻ-i mesfûr Sarraf zimmî fuzûlî zabt ve mesfûrân zimmîlere beyʻ etmiş baʻde’s-suâl hisse-i maʻlûmeden kasr-ı yedlerine tenbîh olunmak taleb ederim deyü daʻvâ eylediğimde bâyiʻ-i mesfûr Sarraf Kazer zimmî bundan akdem ber-vech-i muharrer husûs-ı mezbûru benden daʻvâ ve’l-münâzaʻa <> zimmetimi ibrâ etmiş idi deyü bir kıtʻa hüccet-i şerʻiyye ve üç kıtʻa iʻlâm ibrâzıyla defʻe tasaddî etmekle el-hâletü hâzihî daʻvâ-yı mezkûremde mübtil olup daʻvâ-yı mezkûreden ferağ ve rücûʻ ve mesfûr Sarraf Kazer zimmî şerʻan on beş guruş verip ben dahi baʻde’l-kabz husûs-ı mezkûra müteʻallika âmme-i deʻâvî ve mütâlebâtdan mesfûr Sarraf Kazer ve müstecirler olan mesfûrân Nikola ve Kiryako’dan her birlerinin zimmetlerini ibrâ ve iskāt eyledim deyü baʻde’l-ikrâr ve’t-tasdîk Eyüb mahkemesinde tescîl etdirdikleri iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 16 min-Saferi’l-hayr sene 1162