Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 617 Hüküm no: 1006 Orijinal metin no: [114b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Yorgi’yi sarhoş bir vaziyette iken darbedip yaralayan Veli’nin cezalandırılması Maʻrûz; Havâss-ı refîʻa kazâsında Küçükköy mütemekkinlerinden işbu hâmilü’l-iʻlâm Terzi Yorgi nâm zimmî medîne-i Eyüb’de taʻyîn olunan haseki kulları maʻrifetiyle ihzâr-ı şerʻ olunup yoğurtculuk iddiʻâsında olan Veli nâm kimesne muvâcehesinde târîh-i iʻlâm günü beyne’s-salâteynde karye-i mezbûrede menziline giderken Dörtyolağzı nâm mahalle vardığımda mesfûr Veli âlet-i mücâreheden bir tek piştov ve beyaz kabzalı yatağan ve bıçak ile şürb-i hamrdan sekrân olduğu hâlde üzerime hücûm ve yatağan ile bi-gayr-ı hakkın sol tarafda ağzıma darb ve cerh eyledi deyü baʻde’d-daʻvâ ve’l-inkâr müddeʻî-i mesfûr Yorgi ber-vech-i muharrer müddeʻâsını ol vakitde mürûr eden Müslimîn’den çeyrekci kasabları olan İsmail Beşe b. Abdullah ve Ali Reis b. Ali nâm kimesneler şehâdetleriyle münkir-i mezbûr Veli muvâcehesinde baʻde’l-isbât cerh-i mezbûrun mûcib-i şerʻîsi berʼ-i tâm husûlüne tevkīf-birle tescîl olunup bi’l-iltimâs huzûr-ı âlîlerine iʻlâm olundu. Fermân hazret-i men-lehü’l-emrindir. Fî 21 Saferi’l-hayr sene 1162