Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 618 Hüküm no: 1007 Orijinal metin no: [114b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan Hatun’un evini basıp kendisini korkutan es-Seyyid Mehmed b. İbrahim’in cezalandırılması Maʻrûz; Medîne-i Eyüb’de Mehmed Bey Mahallesiʼnde sâkine bâʻisetü’l-iʻlâm Fâtıma bt. Hasan nâm hatun meclis-i şerʻa ihzâr etdirdiği yine mahalle-i mezbûreden es-Seyyid Mehmed b. İbrahim muvâcehesinde târîh-i iʻlâm gecesi baʻde’l-işâ mezbûr es-Seyyid Mehmed sâkine olduğum menzilim kapısına gelip bana şetm ederek kapımı darb ve tahvîf ve hem-civâr komşularım mutîʻ ve ahz murâd etdiklerinde firâr etmişdir deyü iddiʻâ eyledikde mezbûr es-Seyyid Mehmed münkir olmağla müddeʻiye-i mezbûrenin hem-civârlarından bir recül ve iki <> nefer hatunlar mezbûre Fâtıma’nın sâlihâtdan olduğunu ve mezbûr es-Seyyid Mehmed’in ber-vech-i taʻaddî ve tahvîfini haber vermeleriyle mûcebiyle mezbûr es-Seyyid Mehmed’e şerʻan taʻzîr lâzım geldiği medîne-i mezbûr mahkemesinde baʻde’t-tescîl bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 21 min-Saferi’l-hayr sene 1162