Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 618 Hüküm no: 1008 Orijinal metin no: [114b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Doğramacı Mustafa Beşe’nin oğlu Hüseyin’i bıçakla yaralayan el-Hâc Mehmed’in oğlu Ebûbekir hakkında açılan davada iki tarafın sulh oldukları Medîne-i Eyüb mahallâtından Nazperver Mahallesi’nden olup mecrûhen sâhib-i firâş olmağla huzûru müteʻazzir olan Hüseyin’in babası ve sâbitü’l-vekâle vekîli Doğramacı Mustafa Beşe meclis-i şerʻde işbu bâʻisü’l-iʻlâm el-Hâc Mehmed muvâcehesinde bir gün mukaddem mezbûr el-Hâc Mehmed’in oğlu firâr eden Ebûbekir menzili kapısı önünde kendi oğlum müvekkil-i mezbûr Hüseyin’in sağ tarafda omuzu başından bıçak ile amden ve bi-gayr-ı hakkın darb ve cerh etmiş idi deyü eylediği daʻvâsından kable’s-sübût mezbûr el-Hâc Mehmed fuzûlen sulhe tâlib olmağla bâ-vesâtet-i muslihîn oğlum müvekkil-i mezbûr Hüseyin daʻvâ-yı mezbûresinden ücret-i cerrâh ile yirmi beş guruş üzerine sulh olup mezbûr el-Hâc Mehmed ücret-i cerrâhı ve bedel-i sulhü teberruʻan verip ol dahi baʻde’l-kabz cerh-i mezkûre ve mâ-yuhdesü anhuya müteʻallika, ol dahi bedel-i sulhe müteʻallika âmme-i deʻâvîden her birleri âharın zimmetlerini ibrâ ve iskāt ve katʻ-ı nizâʻ etmeleriyle hüccet-i şerʻiyye olunduğu baʻde’t-tescîl Haseki Ali Ağa kulları iltimâsıyla huzûr-ı âlîlerine iʻlâm olundu. Fermân hazret-i veliyyü’l-emrindir. Fî 24 Saferi’l-hayr sene 1162