Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 619 Hüküm no: 1010 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin eski ortağı Yanaki’den kefâletten dolayı alacaklı olduğu yolundaki iddiâsını ispatlayamadığı Maʻrûz-ı dâʻî-i Devlet-i aliyyeleridir ki; Havâss-ı refîʻa muzâfâtından Silivri kasabasında Pîrî Paşa Mahallesi sükkânından derûn-ı arzuhâlde mezkûr Mustafa Beşe nâm kimesne taʻyîn buyrulan Mumcu Mehmed kulları mübâşeretiyle ihzâr olunan nâhiye-i mezbûra tâbiʻ Fener nâm karye ahâlîsinden arzuhâl sâhibi Yanaki nâm zimmî ile terâfuʻlarında mesfûr Yanaki ile bundan akdem ticâretde şerîkler olmağla hîn-i şirketde işbu mesfûr Yanaki zimmînin cihet-i karz-ı şerʻîden kasabbaşı kâtibi gāib ani’l-meclis el-Hâc İsmail nâm kimesneye bin iki yüz elli guruş deyni olup emriyle edâsına kefîl olduğuma binâʼen gāib-i mezbûr el-Hâc İsmail meblâğ-ı mezbûru benden taleb etmekle ben dahi meblâğ-ı mezbûru mesfûr Yanaki’den taleb ederim deyü eylediği takrîri üzere kable’l-edâ daʻvâ ve mütâlebesi mesmûʻ olmadığından mâʻadâ mesfûr Yanaki yedinde olup bin yüz altmış bir senesi Recebi’l-ferdi’nin yirmi dördüncü günü târîhiyle müverrah hüccet mantûku üzere Silivri Nâibi Mehmed Fehmi Efendi huzûrunda murâfaʻa ve bin iki yüz elli guruş hakkım vardır deyü benden daʻvâ ve mezbûr Mustafa Beşe ile şirketimiz olduğu müddet-i maʻlûmede gerek mâl-ı şirket ve gerek fâiz ve gerek âhardan ve cihet-i uhrâdan istidâne olunan meblâğdan ve sâir beynlerimizde cereyân eden ahz u iʻtânın Fener karyesi Zâbiti Ali Ağa’nın odasında huzûr-ı Müslimîn’de târîh-i hüccetden dört sene mukaddem hesap ve kitâbımızı görüp husûs-ı âmme-i deʻâvîden her birimiz âharın zimmetlerini ibrâ ve iskāt etmiş idik deyü mazmûnu takrîre muvâfık târîh-i mezbûr ile müverrah ve nâib-i mûmâ-ileyhin imzâ ve hatt [u] hatemini hâviye hüccet-i şerʻiyye ibrâz ve gıbbe’l-istintak mezbûr Mustafa Beşe dahi hüccet-i şerʻiyye-i mezkûrenin mazmûnunu dahi ikrâr ve iʻtirâf etmeğin mûcebince mezbûr Mustafa Beşe meblâğ-ı mezbûr mütâlebesiyle bî-vech muʻârazadan menʻ-birle tescîl olunduğu mübâşiri iltimâsıyla huzûr-ı âlîlerine iʻlâm olundu. Bâkī fermân hazret-i veliyyü’l-emrindir. Fî 5 min-Rebîʻülevvel sene 1162