Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 620 Hüküm no: 1011 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un Şerife Nefise Hatun tarafından darbedilip vefât ettiği Maʻrûz; Medîne-i Eyüb’de Servi Mahallesiʼnde sâkine müteveffiye olan Emine nâm hatunu gāib ani’l-meclis Şerife Nefise kendi menzilinde darb-ı şedîd ile darb ve fiʻlinden nâşî mezbûre Nefise’nin menzilinde vefât eylediği beyne’l-ahâlî maʻlûm olmağla haberlerine binâʼen müteveffiye-i mezbûrenin zâhirde vâris-i maʻrûf ve maʻrûfesi olmamağla beytülmâl kabzına meʼmûr Hazret-i Eyüb Vakf-ı şerîfi tarafından bi’l-iltimâs mürsel Mevlânâ Mehmed Efendi’nin müteveffiye-i mezbûrenin cenâzesi üzerine varıp huzûr-ı Müslimîn’den nisvân ve sâlihâtdan Âişe bt. Ahmed ve Fâtıma bt. Abdullah ve Safiye bt. Abdullah nâm hatunlar aʻzâsına nazar etdiklerinde eser-i cerh olmayıp ancak ağzı kan ile memlû ve iki memeleri altında ve iki tarafında boş böğürleri kara bere ve iki elleri dahi kan sıkletinden göğermiş olduğu lede’l-muʻâyene ve’l-müşâhede haber verdiklerini hâzirûn-ı cemâʻat-i Müslimîn huzûrlarında mevlânâ-yı mezbûr vâkiʻ hâli mahallinde baʻde’t-tahrîr meclis-i şerʻa gelip alâ-vukūʻıhî inhâ ve takrîr eyledikleri bi’l-iltimâs huzûr-ı âlîlerine iʻlâm olundu. Fî 9 Rebîʻülevvel sene 1162