Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 621 Hüküm no: 1014 Orijinal metin no: [115a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Topaç Osman’ın katili olduğu iddiâsıyla Mustafa Beşe aleyhine açılan davanın kapandığı Maʻrûz-ı dâʻî-i Devlet-i aliyyeleridir ki; Havâss-ı refî‘a kazâsı muzâfâtından Terkos nâhiyesine tâbi‘ Boyalık nâm karyeden Topaç Osman’ın veresesinden zevcesi ve sulbiye sagīre kızı Nefise’nin vasiyesi olan Hatice Hatun ile vâlidesi Safiye Hatun ve sulbiye-i kebîre kızı Rukiye ve li-ebeveyn kız karındaşlar Hanife ve Havvâ ve li-ebeveyn er karındaşları Ali ve Hüseyin taraflarından sâbitü’l-vekâle vekîlleri olan damadı İmam Ömer Efendi vekâleten ve sulbiye sagīre kızı Şerife Fâtıma’nın vâlidesi ve vasiyesi ve merkūm Topaç Osman’ın zevce-i mutallakası Şerife Zeyneb Hatun ve sâyeten karye-i mezbûr ahâlîsinden Ömer Kethüdâoğlu işbu bâ‘isü’l-i‘lâm Mustafa Beşe ile Çarşamba günü dîvân-ı sadr-ı âlîde meclis-i ma‘kūdda ba‘dehû Eyüb mahkemesinde meclis-i şer‘de terâfu‘larında târîh-i i‘lâmdan iki ay mukaddem merkūm Topaç Osman’ı Akpınar demekle ma‘rûf mahalde mezbûr Mustafa Beşe ve ahâlî-i karyeden birkaç nefer kimesneler katl eylediler Ulu Terkos Nâibi Mehmed Şemseddin Efendi huzûrunda da‘vâ ve müdde‘âlarını her biri ba‘de’l-inkâr yüz guruş bi-kadri’l-hısas bedel-i makbûza sulh olup dem [ü] diyete müte‘allika âmme-i da‘vâdan verese-i kibâr-ı merkūm Mustafa Beşe’nin zimmetini ibrâ etmişler idi ancak [113b-1] [113b-1’den buraya taşınmıştır ] müteveffâ-i mezbûr Topaç Osman’ı karye-i mezbûrede Avcıbaşı? çayırında beyne’s-salâteynde çalı tırpanı ta‘bîr olunur âlet ile merkūm Mustafa Beşe katl etmişdir ve eytâm haklarında sulh dahi sahîh değildir deyü tekrar da‘vâya tasaddî ve müteveffâ-i mezbûr Osman’ın katîlen fevti şer‘an mütebeyyin olmadığından mâ‘adâ verese-i kibâr ba‘de’s-sulh ve’l-ibrâ tasaddî etdikleri da‘vâdan dahi rücû‘ ve teberru‘an otuz guruş dahi bi-kadri’l-hısas merkūm Mustafa Beşe yedinden ahz u kabz edip husûs-ı mezbûra müte‘allika âmme-i da‘vâdan merkūm Mustafa Beşe’nin zimmetini her biri ibrâ ve iskāt edip kat‘-ı nizâ‘ eyledikleri ba‘de’l-ikrâr ve’t-tasdîk mübâşirleri hâssa hasekilerinden Ahmed Ağa ve cebeci kollukcusu Mustafa kulları iltimâsıyla huzûr-ı âlîlerine i‘lâm olundu. Bâkī fermân hazret-i veliyyü’l-emrindir Fî 11 Rebîʻülevvel sene 1162