Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 622 Hüküm no: 1015 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb kazâsının vergilerinin toplanmasında kanun ve nizamlara uyulması Kıdvetü’n-nüvvâbi’l-müteşerriʻîn, Haslar kazâsında nâibü’ş-şerʻ olan mevlânâ ( ) −zîde ilmuhu− tevkīʻ-i refîʻ-i hümâyûn vâsıl olıcak maʻlûm ola ki; hazîne-i âmiremde mahfûz mevkūfât defterleri mûcebince İstanbul nâm-ı diğer Ebâ Eyüb Ensârî kazâsının yüz on üç ve bir sülüs ve bir rubʻ avârız hânesi olup bin yüz altmış iki senesine mahsûben cemʻ ü tahsîli lâzım gelmeğin ( ) deruhde olunup yedine verilen mühürlü, nişanlı mevkūfât defteri sûreti mûcebince cemʻ ü tahsîli ve dâhil-i tersâne-i âmirem etdirilmek emrim olmuşdur, buyurdum ki; hükm-i şerîfimle mübâşir-i mezbûr vardıkda bu bâbda sâdır olan emrim üzere amel edip dahi târîh-i mezbûra mahsûben kazâ-i mezbûrun ol mikdâr avârız hânesi olup tersâne-i âmirem ocaklığı olmağla beher avârız hânesinde dörder yüz yirmi dokuzar akçe kürekci bedeli mîrîlerin irsâl olunan mühürlü ve nişanlı mevkūfât defteri sûreti mûcebince vakt ü zamânıyla yerli yerinde cemʻ ü tahsîl ve dâhil-i tersâne-i âmirem etdirdip hilâf-ı emr u defter kimesneye taʻallül ve muhâlefet etdirmeyesin ve bundan mâʻadâ mübâşir-i merkūmun cihet-i maʻâşı içün beher avârız hânesinden onar akçe vech-i maaş ve on beşer akçe harc-ı tersâne aldırılıp ve avârız içün alınan akçenin mezbûr onar akçesinden bir Esedî guruş tahsîl olunup ve hîn-i tahsîlde mîrî içün alınan akçeyi hazîne-i âmireme alındığı vech üzere aldırıp bundan ziyâde ve noksan alınmaya ve aldırmayasın kesr-i defterden ve noksan-ı hâneden ve fermânımdan ziyâde talebiyle reʻâyâ fukarâsına zulm ü taʻaddîden be-gāyet ihtirâz ve ictinâb eyleyesin şöyle bilesin alâmet-i şerîfime iʻtimâd kılasın. Tahrîren fi’l-yevmi’s-sâlis min-Zi’lkaʻde li-sene ihdâ ve sittin ve miʼe ve elf. Kostantıniyyeti’l-mahrûse