Eyüp Mahkemesi 182 Numaralı Sicil (H. 1154-1161 / M. 1741-1748) cilt: 72, sayfa: 625 Hüküm no: 1020 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâğıdhâne’de ekmek imal eden fırının kirâcısı Rizo’nun ekmek vermek istemediği Maʻrûz; Havâss-ı aliyye kazâsında Kâğıdhâne nâm karyede vâkiʻ nân-ı azîz tabh olunan fırının müsteciri olan Rizo nâm zimmî derûn-ı << arzuhâle >> iʻlâmda mezkûr karye-i mezbûrede müteʻayyen iskemlesine fürûht içün külli yevm bi’t-terâzi taʻyîni olan yüz akçelik ekmeği mugāyir-i iʻlâm ve fermân-ı âlî vermekde taʻallül eylediğini ahâlî-i karye iştikâ ve zimmî-i mesfûrdan suâl olundukda husûs-ı mezbûru ikrâr lâkin iskemle-i merkūm fırın kurbünde olmağla nân-ı azîz vermem deyü muhâlefet etmeğin zikr olunan iskemlesine fürûht içün külli yevm kifâyet mikdârı nân-ı azîz kel-evvel vazʻ ve fürûht olunmak üzere tenbîh olunup fî-mâ baʻd zimmî-i merkūm mütenebbih olmayıp inâd ve muhâlefet ederse meclis-i şerʻa Sâdabâd ustası kulları maʻrifetiyle ihzâr ve tedîb olunması bâbında istidʻâları bi’l-iltimâs huzûr-ı âlîlerine iʻlâm olundu. Fermân hazret-i veliyyü’l-emrindir. Fî 7 Saferi’l-hayr sene 1162