Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 542 Hüküm no: 662 Orijinal metin no: [84b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mülâyim bt. Abdullah’ın, bazı ev eşyalarını kocası Ali Beşe b. Mehmed’e hibe ettiği Mahmiye-i İstanbul hısnı ebvâbından Edirnekapısı dâhilinde Ali Paşa-yı Atîk mahallesi sâkinelerinden Mülâyim bt. Abdullah nâm hâtun meclis-i şer‘-i şerîf-i lâzımü’t-teşrîfde zevci bâ‘isü’l-kitâb Ali Beşe b. Mehmed mahzarında ikrâr ve takrîr-i kelâm edip hibe-i âti’l-beyânın sudûruna değin yedimde mülküm ve hakkım olan eşyâ-i memlûkemden bir beledî döşek ve bir minder ve bir köhne velense ve bir kebe ve iki yemeni yastık ve iki yemeni yorgan ve bir ihrâm ve bir çarşaf ve bir kebîr tencere ve bir orta keçesi ve bir kahve ibriği ve bir sahan ve bir tava ve bir bez tezgâhı zevcim mezbûr Ali Beşe’ye hibe-i sahîha-i şer‘iyye ile hibe ve teslîm edip ol dahi meclis-i hibede ittihâb ve kabûl ve kabz ve tesellüm eyledi ba‘de’l-yevm eşyâ-i mezkûre mezbûr Ali Beşe’nin emlâk-i mevhûbudur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Efendi [b.] Mustafa, Yusuf Çelebi b. ( ) el-Müezzin, Mehmed Efendi b. Hasan, Mustafa b. ( ).