Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 543 Hüküm no: 664 Orijinal metin no: [84b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hatun bt. Mehmed Bey’in, arsasını Şeyh Mehmed Efendi b. Abdullah’a sattığı Mahmiye-i İstanbul’da Âbid Çelebi mahallesi sükkânından umdetü’l-muhadderât Fâtıma Hâtun bt. el-merhûm Mehmed Bey nâm hâtunun zevci ve tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Hacı Muharrem b. Musli ve mûmâ-ileyhânın karındaşı Mustafa Bey nâm kimesne şehâdetleri ile şer‘an sâbit olan umdetü’l-eşbâh Altıpoğaçazâde demekle şehîr İbrahim Ağa b. Mehmed nâm kimesne meclis-i şer‘-i şerîfde bâ‘isü’l-kitâb Şeyh Mehmed Efendi b. Abdullah mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkilemin yedinde mülkü ve hakkı olup mahmiye-i mezbûrda Manisalı Çelebi mahallesinde vâki‘ bir tarafdan tarîk-i âm ve bir tarafdan tarîk-i hâs ve bir tarafdan Ahmed Çelebi tasarrufunda olan vakıf menzil ve bir tarafdan es-Suûdzâde Efendi bahçesi ile mahdûd altı bâb fevkānî oda ve iki sofa ve bir tahta-pûş ve bir bâb tahtânî oda ve iki su kuyusu ve bir mahzen ve bir matbah ve bir bahçe ve etrâf-ı erba‘asında taş duvarı müştemil olup arsasının senede [85a] Ayasofya-i Kebîr vakfı’na otuz altı akçe mukāta‘a-i kadîmesi olan menzilini mezbûr Şeyh Mehmed Efendi tarafından îcâb ve kabûlü hâvî bey‘-i bâtt-ı sahîh-i şer‘î [ile] bin yedi yüz esedî guruşa bi’l-vekâle bey‘ ve teslîm ol dahi iştirâ ve tesellüm ettiğinden sonra semen-i mezbûru yedinden tamâmen ahz u kabz eyledim min ba‘d menzil-i mahdûd-ı mezbûr merkūm Şeyh Mehmed Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-mevâli’l-kirâm Mehmed Efendi, fahrü’l-akrân Ali Ağa b. Abdülfettâh Ağa, Mustafa Çelebi b. Halil, Mehmed Çelebi b. Abdülkādir, Hacı Ahmed Ağa, Mehmed Çavuş b. ( ), Sinan Çelebi, Yusuf Bey.