Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 543 Hüküm no: 665 Orijinal metin no: [85a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. es-Seyyid Receb Çelebi b. Hasan’ın boyacılara kethüda tayin edildiği Mahmiye-i İstanbul’da vâki‘ boyacı tâifesinin ipekçi ve pâreci ta‘bîr olunan cemâ‘ati ihtiyârlarından Ahmed b. Hüseyin ve Zülfikār b. Mehmed ve Halil b. Receb ve İbrahim b. Mustafa ve Ahmed b. Abdullah ve Mehmed Çavuş b. Abdullah nâm kimesneler ile tâife-i mezbûre zimmîlerinin yiğitbaşıları Zafir v. Aleksandra ve Zaharya v. Yorgi ve Manol v. Dimo ve Polhoron v. Yani ve Angelo v. Hırsov ve Dimitri v. Nikola ve diğer Dimitri v. Kiryazi ve Yako v. Mihal ve Nikola v. Yani ve Karaca Todori v. ( ) ve İstemeya v. Yorgi ve Dimitri v. Zafir nâm zimmîler meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda işbu bâ‘isü’l-kitâb es-Seyyid Receb Çelebi b. Hasan nâm kimesne mahzarında her biri ikrâr ve takrîr-i kelâm edip kethüdâmız olan hâzır bi’l-meclis Mehmed b. Abdullah nâm kimesne kethüdâlığını ihtiyârı ile mezbûr es-Seyyid Receb Çelebi’ye fâriğ ve mezbûr Seyyid Receb Çelebi ihtiyârımız olup umûr-ı kethüdâlığı ikāmete kādir ve her vechile lâyık olmağla biz dahi mezbûru beynimizde kethüdâ nasb ve ihtiyâr eyledik taraf-ı şer‘den yedine hüccet verilmek murâdımızdır dediklerinde mezbûr es-Seyyid Receb Çelebi ba‘de’l-yevm tâife-i mezbûreye kethüdâ olmak üzre bu vesîka-i enîka ketb olunup yedine def‘ olundu. Fi’l-yevmi’s-sâbi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, İbrahim Çelebi b. Ahmed, Hasan Çelebi b. Ahmed, Musli b. Mehmed, Veli Bey b. Mehmed.