Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 545 Hüküm no: 667 Orijinal metin no: [85a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yusuf Ağa’nın, Şeyh Ali Efendi’deki alacağının vasî tarafından tahsil edildiği Sâbıkan Şâm-ı şerîfde kapıkulu ağası olup bundan akdem vefât eden Yusuf Ağa’nın verâseti zevce-i metrûkesi Fâtıma bt. Süleyman ve sulbiye kızları Hatice ve Sâliha ve Âmine nâm sagīrlere münhasıra olduğu şer‘an zâhir ve müte‘ayyin oldukdan sonra merkūme Fâtıma’nın vekîl-i müsecceli ve sagīrât-ı mezkûrâtın vasiyy-i muhtârları olan Abdi Ağa nâm kimesne meclis-i şer‘-i şerîfde Şâm-ı şerîf sükkânından bâ‘isü’l-kitâb Bekrizâde demekle şehîr eş-Şeyh Ali Efendi mahzarında vekâleten ve vesâyeten ikrâr ve takrîr-i kelâm edip müteveffâ-yı mezbûr Yusuf Ağa’nın mezkûr Şeyh Ali Efendi zimmetinde deyn-i şer‘îden bin kıt‘a esedî guruş hakkı olup meblağ-ı mezbûrun beş yüz esedî guruşunu merkūm Yusuf Ağa’nın hâl-i hayâtında tarafından ahza vekîl-i müsecceli olan Mehmed Efendi mezbûr Şeyh Ali Efendi’nin abd-i memlûkü olan İvaz yedinden bi’l-vekâle ahz u kabz edip ve yirmi yedi guruşunu müteveffâ-yı mezbûrun hayâtında emri ile Şâm-ı şerîfden İstanbul’a götürmek için on kîse akçenin kirâsına verip bâkī dört yüz yetmiş esedî guruşu kable’l-ahz merkūm Yusuf Ağa vefât edip müvekkile-i mezbûre ile sagīrât-ı mezkûrâta intikāl etmişidi hâlâ meblağ-ı bâkī-i mezbûr dört yüz yetmiş üç esedî guruş mezbûr Şeyh Ali Efendi’nin zimmetinde kalmışidi hâlâ meblağ-ı mezbûr dört yüz yetmiş yedi esedî guruşu vekâleten ve vesâyeten mezkûr Şeyh Ali Efendi yedinden tamâmen ahz u kabz eyledim min ba‘d meblağ-ı mezbûrdan merkūm Şeyh Ali Efendi zimmetinde bir akçe ve bir habbe kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Mehmed Efendi tâbi‘-i Yusuf Ağa, Resul [b.] Rıdvan, Mehmed b. Ramazan. Derkenâr: Kâtib sehv etmekle birinci kağıda kayd olundu.