Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 546 Hüküm no: 668 Orijinal metin no: [85a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Yusuf’un, şaykasını içindeki aletleriyle sattığı Mahrûse-i Galata müzâfâtından kasaba-i Tophâne mahallâtından Cihangir mahallesi sâkinlerinden Mustafa Beşe b. Yusuf nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de umdetü’l-a‘yân ve’l-efhâm el-Hâc Ebûbekir Ağa b. Murad’ın kethüdâsı ve tarafından husûs-ı âti’l-beyâna nehc-i şer‘î ve tarîk-i mer‘î üzre sâbitü’l-vekâle vekîli olan fahrü’l-eşbâh el-Hâc Ali Ağa b. Abdullah ile Panam v. Hristo nâm zimmî mahzarlarında bi’t-tav‘i’s-sâf ikrâr ve i‘tirâf edip akd-i âtînin sudûruna değin yedimde mülküm ve hakkım olup Yeniköy iskelesinde merbût şayka ta‘bîr olunur yirmi zirâ‘ sefînemi ve beynimizde ma‘lûm gemi demiri ve gemi âlâtı safka-i vâhide ile mezbûrân el-Hâc Ali Ağa ile Panam tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin iki yüz kıt‘a esedî guruşa bey‘ ve teslîm edip anlar dahi asâleten ve vekâleten iştirâ ve tesellüm ettiklerinden sonra semen-i mezbûr bin iki yüz esedî guruşu tamâmen yedlerinden alıp kabz eyledim min ba‘d zikr olunan sefîne ve âlâtın nısf-ı şâyi‘ müvekkil-i mûmâ-ileyh el-Hâc Ebûbekir Ağa’nın ve nısf-ı şâyi‘-i âharı mezbûr Panam zimmînin mülk-i müşterâsıdır keyfe mâ yeşâ’ ve yahtâr mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mustafa Çelebi b. Mehmed, Süleyman Efendi b. Yusuf, Mustafa Çavuş b. Nasuh, Mehmed Çelebi b. Ahmed, Süleyman Beşe b. Hızır, Mahmud Efendi b. Mehmed.