Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 546 Hüküm no: 669 Orijinal metin no: [85b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. İbrahim Çelebi’nin, arsasının yarım hissesini Abdülbâki Bey b. İbrahim Çavuş’a sattığı Mahmiye-i İstanbul’da İmâm Ali mahallesi ahâlîsinden olup hâlâ sefer-i hümâyûnda olan Mustafa Ağa b. İbrahim Çavuş nâm kimesne tarafından husûs-ı âti’l-beyâna vekîl olduğu müezzin Ahmed Çelebi b. Mustafa ve Hasan Bey b. Abdullah nâm kimesneler şehâdetleriyle şer‘an sâbit olan Halil Çelebi b. Mehmed nâm kimesne meclis-i şer‘-i şerîfde müvekkil-i mezbûrun karındaşı olup harem-i hümâyûnda büyük oda ahâlîsinden olan bâ‘isü’l-kitâb Abdülbâkī Bey b. İbrahim Çavuş nâm kimesne tarafından husûs-ı câ’îye vekîl olduğu helvacı Mustafa Bey b. Hasan ve şâhidân-ı mezkûrân şehâdetleriyle şer‘an sâbit olan umdetü’l-müderrisîn Sunullah Efendi b. el-merhûm Şeyh İsmail Efendi mahzarında ikrâr ve takrîr-i kelâm edip akd-i âtînin sudûruna değin nısf-ı şâyi‘i müvekkilim mezbûr Mustafa Ağa’nın ve nısf-ı şâyi‘-i âharı müvekkil-i mezkûr Abdülbâkī Bey’in mülkü olup mahalle-i mezbûrede vakı‘a bir tarafdan tarîk-i âm ve bir tarafdan tarîk-i hâs ve bir tarafdan Sinan Çavuş mülkü ve bir tarafdan müvekkil-i mezbûr Abdülbâkī Bey mülkü ile mahdûd arsa benim müvekkilim mezbûr Mustafa Ağa nısf hisse-i şâyi‘asını târih-i kitâbdan bir sene mukaddem sefere gitmeden müvekkil-i mezbûr Abdülbâkī Bey’e tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç yüz elli esedî guruşa bey‘ ve teslîm edip müvekkil-i mezbûr Abdülbâkī Bey dahi iştirâ ve tesellüm ettikden sonra semeni olan meblağ-ı mezbûr üç yüz elli esedî guruşu tamâmen yedinden ahz u kabz etmişidi târih-i mezbûrdan beri arsa-i mahdûde-i mezbûrenin nısf-ı şâyi‘i müvekkil-i mezbûr Abdülbâkī Bey’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’s-sâlikîn eş-Şeyh Himmet Efendi, Mehmed Efendi [b.] Şeyh Ahmed Efendi, Receb b. Fazlullah, Ahmed Efendi el-Keşşâf, İbrahim Çelebi b. Ahmed, İbrahim b. Şaban.