Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 548 Hüküm no: 671 Orijinal metin no: [85b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in kılıcını kilitli odasından Ahmed b. Ali’nin aldığı ve iadesi Mahmiye-i İstanbul’da Elçi Hanı demekle ma‘rûf handa sâkin bâ‘isü’l-kitâb Mehmed b. Ahmed nâm kimesne meclis-i şer‘-i şerîf-i lâzımü’t-teşrîfde mahmiye-i mezbûrda Mahmud Paşa câmi‘i kurbunda sâkin Ahmed b. Ali nâm kimesne mahzarında üzerine da‘vâ ve takrîr-i kelâm edip mezbûr Ahmed’in yedinde olan işbu sîm kılıç benim mülküm olup hân-ı mezbûrda olan mukaffel odam içinde iken mezbûr Ahmed târih-i kitâb günü kable’z-zuhr odanın kilidini kırıp zikr olunan kılıcı ve üç altın ve üç esedî guruşumu ahz u kabz etmişdir suâl olunup alıverilmek matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda hân-ı mezbûrda sâkin Mustafa b. Emrullah nâm kimesne li ecli’ş-şehâde meclis-i şer‘a hâzır olup istişhâd olunduklarında fi’l-hakīka ve zikr olunan kılıcı mezbûr Ahmed hân-ı mezbûrun iskelesinden aşağı alıp gider iken ben görmüşdüm işbu kılıç müdde‘î-i mezbûrun mülküdür ben bu husûsa bu vech üzre şâhidim şehâdet dahi ederim deyû edâ-i şehâdet-i şer‘iyye ettikden sonra hân-ı mezbûr sükkânından Mustafa b. Abdullah nâm kimesne dahi li ecli’ş-şehâde meclis-i şer‘a hâzır olup istişhâd olundukda fi’l-hakīka zikr olunan işbu sîm kılıç müdde‘î-i mezbûrun mülkü olup Hüseyin nâm kimesne mezbûr Ahmed’in yedinden alır iken ben görmüşdüm, bu husûsa bu vech üzre ben şâhidim şehâdet dahi ederim deyû edâ-i şehâdet-i şer‘iyye ettiğinden sonra her birinin şehâdeti makbûle olmağın müdde‘î-i mezbûr bâkī da‘vâsı için beyyineye havâle olunup tahlîf-i şer‘î ile tahlîf olundukdan sonra mûcebince zikr olunan kılıç müdde‘î-i mezbûra teslîme merkūm Ahmed’e tenbîh olunmağın mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed b. Ali, Mustafa Çavuş b. Ramazan, Mehmed b. Hasan, çukadâr Hasan [b.] Abdullah, Ahmed Beşe b. Osman, Mehmed b. Ramazan.