Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 548 Hüküm no: 672 Orijinal metin no: [85b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Yusuf Ağa’nın, Şeyh Ali Efendi’deki alacağının vasî tarafından tahsil edildiği Sâbıkan Şâm-ı şerîfde kapıkulu ağası olup bundan akdem vefât eden Yusuf Ağa’nın verâseti zevce-i metrûkesi Fâtıma bt. Süleyman ile sulbiye kızları Hatice ve Sâliha ve Âmine nâm sagīrelere münhasıra olduğu şer‘an zâhir ve mütebeyyin oldukdan sonra merkūme Fâtıma’nın vekîl-i müsecceli ve sagīrât-ı mezkûrâtın vasiyy-i muhtârları olan Abdi Ağa meclis-i şer‘-i şerîfde Şâm-ı şerîf sükkânından Bekrizâde demekle şehîr bâ‘isü’l-kitâb eş-Şeyh Ali Efendi mahzarında vesâyeten ve vekâleten ikrâr ve takrîr-i kelâm edip müteveffâ-yı mezkûr Yusuf Ağa’nın merkūm Şeyh Ali Efendi zimmetinde cihet-i deyn-i şer‘îden bin kıt‘a esedî guruş hakkı olup meblağ-ı mezbûru ahz u kabza vekîl-i müsecceli olan Mehmed Efendi mezbûr eş-Şeyh Ali Efendi’nin abd-i memlûkü olan İvaz yedinden bi’l-vekâle ahz u kabz edip ve yirmi yedi esedî guruşunu müteveffâ-yı mezkûrun hayâtında emri ile Şâm-ı şerîfden İstanbul’a götürmek için on kîse akçesinin kirâsına verip bâkī dört yüz yetmiş üç guruşu kable’l-ahz merkūm Yusuf Ağa vefât edip müvekkile-i mezbûre ile sagīrât-ı mezkûrâta intikāl etmişidi hâlâ meblağ-ı bâkī-i mezbûr dört yüz yetmiş üç esedî guruşu vekâleten ve vesâyeten mezkûr Şeyh Ali Efendi yedinden tamâmen alıp kabz eyledim min ba‘d meblağ-ı mezbûrdan merkūm Şeyh Ali Efendi zimmetinde bir akçe ve bir habbe kalmamışdır ve merkūm Şeyh Ali Efendi mukaddemâ müteveffâ-yı mezbûr Yusuf Ağa’ya meblağ-ı mezbûr için verdiği mümzâ ve mahtûm deyn temessükü zâyi‘ olmağın eğer zikr olunan temessük ba‘de’l-yevm bir tarîk ile zuhûr ederse aslâ amel olunmaya dedikde gıbbe’t-tasdîk mâ hüve’l-vâki‘ bi’t-taleb ketb olundu. Fi’l-yevmi’s-sâmin min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah Kethüdâ-yı muhzırân, Mehmed Efendi b. ( ), Baba Resul [b.] Rıdvan, Gazanfer b. Tevekkül.