Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 549 Hüküm no: 673 Orijinal metin no: [85b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Mehmed’in evini basıp bazı eşyalarını alanların tespiti Husûs-ı âti’l-beyânın mahallinde tahrîri iltimâs olunmağın mahmiye-i İstanbul’da Saray-ı cedîd-i âmire’de vâki‘ bostancılar odası demekle ma‘rûf odaya varılıp hâlâ bostancıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim el-Hâc Mustafa ile zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf olundukda mahrûse-i Üsküdar’da Doğancılar mahallesinde sâkin Oturak Ahmed Beşe b. Mehmed nâm kimesne meclis-i ma‘kūd-ı mezbûrda Abdi b. Ahmed ve Şaban b. Ali nâm kimesneler mahzarlarında üzerlerine da‘vâ ve takrîr-i kelâm edip mezbûrân Abdi ve Şaban târih-i kitâbdan yirmi gün mukaddem Mustafa ve Ramazan ve peremeci Hüseyin ve aşçı [bekçi] Veli [b.] Derviş ve Kürd Yusuf nâm kimesne ve Papasoğlu Yani ve Karaca nâm zimmîler ile müctemi‘ olup ellerinde âlet-i darb olduğu hâlde gece ile mahalle-i mezbûrda vâki‘ menzilimi basıp muhrez olan mahallinden bir sîm topuz [ve bir sîm] Haydârî raht ve ba‘zı eşyâmı ahz u kabz edip beynlerinde iktisâm ettiklerinde her birinin hissesine yirmi beşer dirhem sîm isâbet etmişdir suâl olunup mûceb-i şer‘îsi icrâ olunmak matlûbumdur dedikde, gıbbe’s-suâl mezbûrân Abdi ve Şaban vech-i muharrer üzre müdde‘î-i mezbûrun merkūmûn Mustafa ve Ramazan ve peremeci Hüseyin ve bekçi Veli ve Kürd Yusuf ve Papasoğlu Yani ve Karaca ile evini basıp muhrez olan mahallinden bir sîm topuz ve bir sîm Haydârî raht ve ba‘zı eşyâsını ahz u kabz ve beynlerinde iktisâm ettiklerinde her birimizin hissesine yirmi beş dirhem sîm düşüp her biri hissesi için kabz ettiği nisâb-ı serîkaya bâliğ olduğu ikrâr ve i‘tirâf [86a] etmeğin mûcebince ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Umdetü’l-meşâyihi’l-kirâm eş-Şeyh Abdülvehhâb Efendi [b.] eş-Şeyh Abdurrahman Efendi, Osman Efendi b. Abdülhalim, Ömer Efendi b. Mehmed Kâtib-i Sebzehâne, Ahmed Efendi [b.] Mustafa, Mustafa Çelebi b. Süleyman, Ali Efendi b. Mustafa el-İmâm, Hasan Ağa b. Hüseyin, Derviş b. Bayram.