Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 550 Hüküm no: 674 Orijinal metin no: [86a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şas v. Şamşon’un evini basıp bazı eşyalarını alanların tespiti Husûs-ı âti’l-beyânın mahallinde tahrîri iltimâs olunmağın mahmiye-i İstanbul’da Saray-ı cedîd-i âmire’de vâki‘ bostancılar odası demekle ma‘rûf odaya varılıp hâlâ bostancıbaşı olan umdetü’l-emâcid ve’l-ekârim câmi‘ü’l-mehâmid ve’l-mekârim el-Hâc Mustafa Ağa ile zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf olundukda mahrûse-i Galata’ya tâbi‘ kasaba-i Beşiktaş’da Paşa mahallesinde sâkin olup tâife-i Yahud’un Alaman cemâ‘atinden olan Şas v. Şamşon nâm Yahudi meclis-i ma‘kūd-ı mezbûrda Abdi b. Ahmed ve Şaban b. ( ) nâm kimesneler üzerlerine da‘vâ ve takrîr-i kelâm edip mezbûrân Abdi ve Şaban ve Mustafa ve Ahmed ve Kürd Yusuf b. Ali ve karındaşı diğer Mustafa ve peremeci Hüseyin ve Kasımpaşalı diğer Hüseyin ve Veli ve bundan akdem fevt olan Abdüllatîf nâm kimesneler ve Balaban ve Karaca Bulgar nâm zimmîler ile müctemi‘an ellerinde âlet-i harb olduğu hâlde gece ile mahalle-i mezbûrede vâki‘ menzilimi basıp muhrez olan mahallinden eşyâmı ahz u kabz ve beynlerinde iktisâm ettiklerinde vech-i muharrer üzre ahz u kabz ettikleri eşyâmdan işbu mahalde mevcûd yedi guruş kıymetli yedi zirâ‘ serâser ve kırk beş guruş kıymetli kırmızı fitilli dokuz zirâ‘ dîbâ mezbûr Abdi’nin hissesine isâbet edip mezbûrân Abdi ve Şaban’ın hissesine isâbet eden nisâb-ı serîkaya bâliğ olmağla suâl olunup mûceb-i şer‘îsi icrâ olunmak matlûbumdur dedikde gıbbe’s-suâl mezbûrân Abdi ve Şaban vech-i mübeyyen üzre müdde‘î-i mezbûrun evini basıp muhrez olan mahallinden ahz u kabz eyledikleri eşyâyı beynlerinde iktisâm ettiklerinde zikr olunan serâser dîbâ mezbûr Abdi’nin hissesine düşüp biribiri hissesi için kabz ettiği nisâb-ı serîkaya bâliğ olduğunu ikrâr ve i‘tirâf etmeğin mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Sâbikūn.