Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 551 Hüküm no: 675 Orijinal metin no: [86a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tavuk hırsızları İsmail b. Osman ile Mehmed b. Abdullah’ın suçlarını kabul ettikleri Husûs-ı âti’l-beyânın mahallinde tahrîri iltimâs olunmağla mahmiye-i İstanbul’da Saray-ı cedîd-i sultânî’de vâki‘ bostancılar odası demekle ma‘rûf odaya varıp zeyl-i kitâbda muharrerü’l-esâmî olan Müslimîn huzûrunda akd-i meclis-i şer‘-i şerîf olundukda hâlâ bostancıbaşı olup sürrâk ve kuttâ‘-ı tarîki ahza memûr olan iftihârü’l-emâcid ve’l-ekârim câmi‘ü’l-mehâmid ve’l-mekârim el-Hâc Mustafa Ağa meclis-i ma‘kūd-ı mezbûrda mahmiye-i İstanbul’da Lâlezâr mahallesi sükkânından İsmail b. Osman ve Karabaş mahallesi sükkânından Mehmed b. Abdullah nâm kimesneler mahzarlarında takrîr-i kelâm ve ta‘bîr ani’l-merâm edip mezbûrân İsmail ve Mehmed ba‘zı kimesnelerin bi gayrı hakkın tavukları[nı] ahz u kabz etmişlerdir, suâl olunup takrîrleri tahrîr olunmak matlûbumdur dedikde gıbbe’s-suâl mezbûrân İsmail ve Mehmed cevâblarında fi’l-hakīka Medîne-i Ebî Eyyûb’a tâbi‘ Cuhûd Burgaz nâm karye ahâlîsinden ( ) nâm zimmînin menzilinden gece ile vech-i muharrer üzre on tavuğunu ve Beres nâm karye ahâlîsinden ( ) nâm zimmînin on tavuğunu ve Topçular nâm karye ahâlîsinden Ömer Çelebi nâm kimesnenin on tavuğunu ve Otakçılar mahallesinden bir kimesnenin evinden on tavuğunu ve Edirnekapısı hâricinde bir evden dahi on tavuk ve Taşlık’da Üstoyko nâm zimmînin evinden on altı tavuğunu ve Hazînedar bahçesi’nden on tavuk ve Müderrisköyü nâm karyeden bir evin duvarını delip yirmi bir tavuğunu ve Topkapısı hâricinde bir evden on altı tavuk ve Topkapısı ile Yenikapı beyninde vâki‘ bir evden sekiz tavuk ve gāib ani’l-meclis Mustafa nâm kimesne ile Kalatarya nâm karyede Kasab Kosta’nın menzilinden on tavuk ve üç kazını ve Ayayorgi nâm karyede bir evden dokuz tavuk ahz u kabz edip köylerde bey‘ ile istihlâk eyledik dediklerinde mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Es-Sâbikūn.