Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 555 Hüküm no: 681 Orijinal metin no: [86b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muzaffer Ağa b. Mehmed’in, bağını Ali Ağa b. Abdullah’a sattığı Dârü’l-hilâfeti’l-aliyye Kostantıniyye el-mahmiyye mahallâtından Ayasofya-i Kebîr mahallesi sâkinlerinden umdetü’l-emâsil ve’l-a‘yân Muzaffer Ağa b. Mehmed’in sulbî oğlu ve tarafından husûs-ı âti’l-beyâna vekîl olduğu Mahmud Çelebi b. Mehmed ve Mehmed b. Hasan nâm kimesneler şehâdetleriyle şer‘an sâbit olan fahrü’l-eşbâh Mansur Çelebi meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda Saray-ı cedîd-i sultânî’de Hazîne-i âmire odası sâkinlerinden fahrü’l-eşbâh Ali Ağa b. Abdullah tarafından husûs-ı câ’i’l-beyâna nehc-i şer‘î ve tarîk-i mer‘î üzre sâbitü’l-vekâle vekîl olan helvacı Hüseyin Bey b. Mehmed mahzarında bi’l-vekâle ikrâr ve takrîr-i kelâm edip müvekkil-i mûmâ-ileyh Muzaffer Ağa bey‘-i âti’z-zikrin sudûruna değin yedinde mülkü ve hakkı olup medîne-i Üsküdar’a tâbi‘ Kadıköyü’nde Ulusuluk nâm mevzi‘de vâki‘ beyne’l-ahâlî ve’l-cîrân ma‘lûmü’l-hudûd bir kıt‘a bağını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile üç yüz kıt‘a esedî guruşa vekîl-i mezbûr Hüseyin Bey’e bey‘ ve teslîm ol dahi müvekkili mûmâ-ileyh Ali Ağa için iştirâ ve kabûl ve kabz ve tesellüm eyledikden sonra semeni olan meblağ-ı mezbûr üç yüz kıt‘a esedî guruşu yedinden tamâmen ahz u kabz eyledi ba‘de’l-yevm zikr olunan bir kıt‘a bağ müvekkil-i mûmâ-ileyh Ali Ağa’nın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Abdurrahman Bey b. Mehmed, Ali Bey b. Veli Helvâyî, Hamza Halîfe b. Hasan, İsa Halîfe b. İlyas, Mehmed b. İbrahim.