Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 556 Hüküm no: 682 Orijinal metin no: [86b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sagar v. Yorgi’nin, evini bey‘ bi’l-vefâ ile Ali Beşe b. Oruç’a sattığı Fi’l-asl vilâyet-i Anadolu’da Ürgüb kasabasından olup Medîne-i Galata’da Karaköy kapısında şîrugancı olan Sagar v. Yorgi nâm [zimmî] meclis-i şer‘-i şerîf-i lâzımü’t-teşrîfde işbu râfi‘ü’l-kitâb Ali Beşe b. Oruc nâm kimesne mahzarında ikrâr ve takrîr-i kelâm edip kasaba-i mezbûrede zimmî mahallesinde vâki‘ bir tarafından İskender Beşe b. Yusuf nâm kimesne mülkü ve bir tarafı Osman Beşe ( ) nâm kimesne mülkü ve bir tarafdan cebel ve bir tarafdan tarîk-i âm ile mahdûd bir bâb kesik ta‘bîr olunur oda ve bir matbah ve bir ahır ve havluyu müştemil olan mülk menzilimi târih-i kitâbdan üç yüz gün tamâmına değin bey‘ bi’l-vefâ ile merkūm Ali Beşe’ye yüz yirmi esedî guruşa bey‘ edip ol dahi minvâl-i muharrer üzre iştirâ ve kabûl eyledikden sonra semeni olan meblağ-ı mezbûr yüz yirmi esedî guruşu merkūm Ali Beşe yedinden ahz u kabz eyledim eğer meblağ-ı mezbûru vech-i muharrer üzre üç yüz altmış gün tamâmında edâ edemez isem bey‘-i mezbûr bâtta münkalib olsun dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: İbrahim Çelebi [b.] Ahmed, Yusuf b. Abdullah, Hasan Çelebi b. Ahmed, Mehmed b. Ramazan.