Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 557 Hüküm no: 683 Orijinal metin no: [87a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Ağa b. Abdülmennân’ın, evini Ali Çelebi b. Veli’ye borcuna karşılık rehin verdiği ve borcuna takas ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i celîl-i lâzımü’t-tebcîlden mevlânâ Ömer Efendi b. İsmail irsâl olunup ol dahi Dârü’l-hilâfeti’l-aliyye Kostantıniyye el-mahmiyye mahallâtından Hoca Üveys mahallesi sâkinlerinden Kefe nâzırı olan fahrü’l-akrân Yusuf Ağa b. Abdülmennân’ın menziline varıp zeyl-i rakīmde isimleri terkīm olunan udûl-i müslimîn mahzarlarında akd-i meclis-i şer‘-i mübîn eyledikde mûmâ-ileyh Kefe nâzırı Yusuf Ağa meclis-i ma‘kūd-ı mezbûrda işbu hâfızü’l-kitâb umdetü’l-emâsil ve’l-a‘yân Ali Çelebi b. Veli mahzarında bi’t-tav‘i’s-sâf ikrâr ve i‘tirâf edip mahalle-i mezbûrda vâki‘ bir tarafdan İsa Efendi dâmâdı mülkü ve bir tarafdan ba‘zen tarîk-i hâs ve ba‘zen Dellâk Osman Beşe ve iki tarafdan tarîk-i âm ile mahdûd hâriciyyesinde karşı-be-karşı fevkānî iki oda ve ortalarında bir sofa ve bir kameriye ve dehliz ve bir ahır ve bir kenîf ve bir su kuyusu ve havluyu ve dâhiliyyesinde fevkānî üç oda ve iki sofa ve tahtânî iki oda ve bir matbah ve hadîka ve bir su kuyusu ve kenîfi müştemil işbu mülk menzilimi cemî‘ tevâbi‘ ve levâhıkı ve âmme-i hukūk ve merâfıkı ile mûmâ-ileyh Ali Çelebi’ye bi tarîki’l-istiğlâl üç bin yüz kıt‘a riyâlî kebîr guruşa bey‘ ve teslîm edip ol dahi iştirâ ve kabûl ve kabz ve tesellüm eyledikden sonra semeni olan meblağ-ı mezkûr üç bin yüz kıt‘a esedî riyâlî kebîr guruşu mûmâ-ileyh Ali Çelebi’nin deyn-i şer‘îden zimmetimde lâzımü’l-edâ hakkı olan üç yüz kıt‘a tâmmü’l-vezn riyâlî kebîr guruşa takās eyleyip ol dahi mukāssa ve kabûl eyledikden sonra müşârün-ileyh Ali Çelebi menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan üç yüz altmış gün tamâmına değin yedi bin iki yüz akçeye bi şarti’t-ta‘cîl bana îcâr ve teslîm edip ben dahi istîcâr ve kabûl ve kabz ve tesellüm eyledikden sonra mûmâ-ileyh Ali Çelebi icâre-i mezbûre yedi bin iki yüz akçeden zimmetimi ibrâ eyledi dedikde gıbbe’t-tasdîki’ş-şer‘î mûmâ-ileyh Kefe nâzırı Yusuf Ağa meclis-i mezbûrda i‘âde-i kelâm edip bey‘-i mezbûr hakīkatde rehn olduğuna binâen deyn-i mezkûr üç bin yüz kıt‘a tâmmü’l-vezn riyâlî kebîr guruşu mûmâ-ileyh Ali Çelebi’ye üç yüz altmış gün tamâmında edâ ve teslîm eylemezsem menzil-i mahdûd-ı mezkûru semen-i misli ile âhara bey‘ ve kabz-ı semen edip deyn-i mezkûr üç bin yüz kıt‘a tâmmü’l-vezn riyâlî kebîr guruşu müşârün-ileyh Ali Çelebi’ye edâ ve teslîm ve fazlasını bana îsâle küllemâ azeltüke fe-ente vekîli vekîl-i mazmûnu üzre azl ve in‘izâlden masûne vekâlet-i devriye ile işbu Mustafa Çelebi b. Ahmed’i tarafımdan vekîl ve menâbıma nâib nasb ve ta‘yîn eyledim dedikde merkūm Mustafa Çelebi dahi vekâlet-i mezbûreyi kabûl ve merâsimini edâya ta‘ahhüd ettikden sonra mûmâ-ileyh Kefe Nâzırı Yusuf Ağa’nın zevce-i menkûhası Lâlegûn bt. Abdullah nâm hâtun tarafından ikrâr-ı âti’z-zikre vekîl olduğu zâtını ma‘rifet-i şer‘iyye ile ârifân Ahmed Sufi b. Şaban ve Osman Beşe b. İbrahim nâm kimesneler şehâdetleriyle şer‘an sâbit olan el-Hâc Ali b. el-Hâc Hüseyin nâm kimesne meclis-i şer‘-i mezbûrda mûmâ-ileyh Kefe Nâzırı Yusuf Ağa mahzarında bi’l-vekâle ikrâr ve takrîr-i kelâm edip menzil-i mahdûd-ı mezkûr müşârün-ileyh Yusuf Ağa’nın mülk-i sırfı olup müvekkile-i mezbûre Lâlegûn Hâtun’un bi vechin mine’l-vücûh kat‘â alâka ve medhali yokdur dedikde gıbbe’t-tasdîki’ş-şer‘î husûs-ı mezbûru mevlânâ-yı mezbûr mahallinde tahrîr edip ba‘dehû ma‘an irsâl olunan Receb Çelebi b. el-Hâc Murad ve Hasan Çelebi b. Bayram ile meclis-i şer‘-i hatîr-i lâzımü’t-tevkīre gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çelebi b. Kasım, Mustafa Çelebi b. Ahmed, Hüseyin Çelebi b. Hasan, Mahmud Halîfe b. Şaban, Abdi Beşe b. Receb, Ahmed Beşe b. Süleyman, İbrahim Çavuş b. Gazanfer.