Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 558 Hüküm no: 684 Orijinal metin no: [87a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Mehmed’in borcunu ödemesi ve rehin eşyalarını teslim alması gerektiği Mahmiye-i İstanbul’da Molla Ahî mahallesi sükkânından olup bundan akdem vefât eden el-Hâc Sinan’ın sulbî oğlu Ahmed nâm sagīrin kıbel-i şer‘den mansûb vasîsi olan Dilâver Bey [b.] Abdullah nâm kimesne meclis-i şer‘-i hatîr-i lâzımü’t-tevkīrde Mustafa Bey b. el-merhûm Mehmed Paşa mahzarında üzerine da‘vâ ve takrîr-i kelâm edip merkūm Mustafa Bey zimmetinde sagīr-i mezbûrun beş yüz esedî guruş asl ve devr-i şer‘î ile üzerine ilzâm olunan ribhden dahi yetmiş beş esedî guruş cem‘an beş yüz yetmiş beş esedî guruş hakkı olup merkūm Mustafa Bey mukābelesinde bir sîm kabzalı altın kılıç ve bir mücevher altın hançer ve bir aylı ve günlü sîm sâ‘atini rehn vaz‘ ve teslîm etmişdi, hâlâ merkūm Mustafa Bey’den suâl olunup meblağ-ı mezbûru bana teslîme ve rehn olan eşyâ-i mezbûreyi teslîme tenbîh olunması matlûbumdur dedikde, gıbbe’s-suâl mezkûr Mustafa Bey cevâbında fi’l-hakīka sagīr-i mezbûra beş yüz esedî guruş asl-ı mâl ve devr-i şer‘î ile üzerime ilzâm olunan ribhden dahi yetmiş beş esedî guruş cem‘an beş yüz yetmiş [beş] guruş zimmetimde lâzımü’l-edâ ve vâcibü’l-kazâ deynim olup ve zikirleri mürûr eden bir sîm kabzalı altın kılıç ve bir mücevher hançer ve bir aylı ve günlü sîm sâ‘at vasiyy-i mezbûr yedinde rehindir deyû ikrâr etmeğin mûcebince meblağ-ı mezbûru vasiyy-i merkūma edâ ve teslîm ve rehn-i mezbûreyi tahlîs ve teslîme merkūm Mustafa Bey’e tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Ahmed Efendi el-Keşşâf, çukadâr Hasan Beşe b. Abdullah, İbrahim Çelebi b. Ahmed.