Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 559 Hüküm no: 685 Orijinal metin no: [87a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Çelebizâde Mahmud Efendi Vakfı’ndan Pîrî Çelebi’ye verilen borcun kardeşi Osman Çelebi’den tahsil edilmesi Merhûm Kara Çelebizâde Mahmud Efendi vakfı’na bi’l-fi‘l mütevellî olan bâ‘isü’l-kitâb Cafer Çavuş b. Mehmed meclis-i şer‘-i hatîr-i lâzımü’t-tevkīrde Osman Çelebi b. İbrahim mahzarında bi’l-vekâle da‘vâ ve takrîr-i kelâm edip bundan akdem vakf-ı mezbûra mütevellî olan Zağarcı Ali Bey nâm kimesne merkūm Osman Çelebi’nin karındaşı gāib ani’l-meclis Pîrî Çelebi’ye mâl-ı vakf-ı mezbûrdan yüz yedi buçuk riyâlî guruş ikrâz ve teslîm eyledikden sonra merkūm Pîrî Çelebi bundan akdem vakf-ı mezkûra deyni olan meblağ-ı mezkûr yüz yedi buçuk guruşu mezkûr Ali Bey’e karındaşı merkūm Osman Çelebi’den üçü bir mahalde iken havâle eyledikde merkūm Osman Çelebi meblağ-ı mezbûru vech-i muharrer üzre taraf-ı vakfa edâ etmek üzre havâle-i sahîha-i mezbûreyi kabûl etmişidi, hâlâ meblağ-ı mezbûr yüz yedi buçuk guruşu merkūm Osman Çelebi’den bi’t-tevliyye taleb ederim suâl olunsun dedikde gıbbe’s-suâl mezkûr Osman Çelebi cevâbında fi’l-hakīka vech-i meşrûh üzre cihet-i havâleden taraf-ı vakf-ı mezbûra zimmetimde yüz yedi buçuk riyâlî guruş deynim vardır deyû ikrâr ve i‘tirâf etmeğin mûcebince meblağ-ı mezbûr yüz yedi buçuk riyâlî guruşu müdde‘î-i mezbûra edâ ve teslîme mezbûr Osman Çelebi’ye tenbîh olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Molla Mehmed b. Musa, İbrahim Çelebi b. Aslan, Mehmed Efendi b. İsmail el-Hatîb.