Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 56 Hüküm no: 9 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Şehsuvar ile Kamer bt. el-Hâc Memi’nin, vefât eden Hüseyin’in çocukları olduğundan mirasta hak sahibi oldukları Vilâyet-i Anadolu’da İbradi kazâsına tâbi‘ Orta nâm karye ahâlîsinden Yusuf b. Şehsuvar ve Kamer bt. el-Hâc Memi tarafından husûs-ı âtiye vekîl olup el-Hâc Mustafa b. Ahmed ve Yahya b. Mehmed şehâdetleri ile vekâleti sâbite olan İsmet b. Abdülkerim nâm kimesne meclis-i şer‘-i şerîfde mahmiye-i İstanbul’da Kâtib Şemseddin Mahallesi’nde sâkin iken bundan akdem vefât eden Hüseyin nâm kimesnenin muhallefâtına vâzı‘u’l-yed olan zevcesi Ceyhun bt. Abdullah nâm hatun tarafından Mansur b. Nureddin el-Hâc Yusuf b. Mehmed nâm kimesneler şehâdetleri ile vekâleti sâbit olan es-Seyyid Salih Çelebi b. es-Seyyid Hasan nâm kimesne muvâcehesinde üzerine da‘vâ edip müvekkilem mezbûre Kamer Hatun müteveffâ-i mezbûrun li-ebeveyn karındaşı ve müvekkilim mezbûr Yusuf usûbet-i nesebiye cihetinden vârisi olup mezbûre Ceyhun muhallefât-ı müteveffâ-i mezbûrun rub‘u ve nısfı mezbûre Kamer Hatun’a ve bâkīsi mezbûr Yusuf’a intikāl eylemiş iken mezbûr Ceyhun müvekkillerim mezbûrânın hisselerini vermede te‘allül eder, suâl olunup alıverilmesi matlûbumdur dedikde gıbbe’s-suâl mezbûre Ceyhun inkâr etmekle müdde‘î-i mezbûrdan beyyine taleb olundukda el-Hâc Mehmed b. Hüseyin ve Ahmed b. Yusuf nâm kimesneler hâzırân olup fi’l-hakīka mezbûre Kamer müteveffâ-i mezbûrun li-ebeveyn karındaşı olup babaları adı Memi ve anaları adı Durbula ve maskat-ı re’sleri karye-i mezbûredir, mezbûr Yusuf dahi müteveffâ-i mezbûrun kezâlik li-ebeveyn karındaşı Şehsuvar’ın oğlu ve usûbet-i nesebiye cihetinden vârisidir, bu husûsa şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde mûcebiyle hükm-birle mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min-Cumâdelâhire li-sene selâse ve sittin ve elf. Şuhûdü’l-hâl: İbrahim Çelebi [b.] Davud, Pîrî b. Hüseyin er-Ressâm, Mehmed Çelebi [b.] Hüseyin, Halil b. Lütfullah, Rıdvan b. Abdullah.