Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 56 Hüküm no: 10 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât etmiş olan Hüseyin’e ait olan evin es-Seyyid Salih Çelebi’ye satıldığı Mahmiye-i İstanbul’da Kâtib Şemseddin Mahallesi’nde sâkin iken bundan akdem vefât eden Hüseyin b. Memi nâm kimesnenin verâseti zevce-i metrûkesi Ceyhun bt. Abdullah ve li-ebeveyn kız karındaşı Kamer nâm hatunlara usûbet-i nesebiye cihetinden vârisi olup li-ebeveyn er karındaşı oğlu Yusuf b. Şehsuvar nâm kimesneye münhasıra olduğu müte‘ayyen oldukdan sonra mezbûrlar taraflarından husûs-ı âtîye vekîl olup el-Hâc Mustafa b. Ahmed ve Yahya b. Mehmed nâm kimesneler şehâdetleri ile vekâleti sâbite olan İsmet b. Abdülkerim nâm kimesne mahfil-i kazâda işbu bâ‘isü’l-kitâb es-Seyyid Salih Çelebi b. es-Seyyid Hüseyin muvâcehesinde bi’l-vekâle ikrâr edip mahalle-i mezbûrede vâki‘ bir tarafdan Ali b. Ahmed mülkü ve bir tarafdan Mihriban bt. Abdullah ve bir tarafdan Mehmed Bey b. ( ) mülkü ve bir tarafdan tarîk-i âm ile mahdûd olup tabaka-i ulyâsı bir beyt ve vasatı bir beyt ve bir sofa ve kenîf ve süflâda bir beyt ve bi’r-i mâ ve kenîf ve muhavvatayı hâvî menzilin nısf-ı şâyi‘i müteveffâ-i mezbûrun mülkü olup bi-hasebi’l-irsi’ş-şer‘î rub‘u zevcesi mezbûre Haçun’a ve nısfı merkūm Kamer’e ve rub‘-ı bâkī mezbûr Yusuf’a intikāl etmekle hâlâ vekâletim hasebiyle on bin akçeye bey‘ edip ve semeni olan meblağ-ı mezbûru müşteri-i mezbûr es-Seyyid Salih Çelebi yedinden bi’t-tamam alıp kabz eyledim dedikde mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min-Cumâdelâhire li-sene selâse ve sittin ve elf. Şuhûdü’l-hâl: Mehmed Efendi b. Mustafa, es-Seyyid Mehmed Efendi b. es-Seyyid Ali Efendi, Ali Kethüdâ b. Mehmed, Mehmed Çelebi b. Hüseyin, Resül b. Hüseyin, Rıdvan b. Abdullah.