|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 259 Hüküm no: 319 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Ahmed’in Mahmud Reis’te mudârebeden alacağı olduğu
Hüccet-i havâle Bundan akdem hâric-i Galata mahallâtından Mustafa Ağa mahallesinde sâkin olup vefât eden merhûm Mahmud Reis b. Şaban nâm müteveffânın sulbiye kızı Emine bt. Mahmud nâm sagīreye kıbel-i şer‘den bundan akdem vasî olan el-Hâc Ahmed b. Şaban [nâm] kimesne muvâcehesinde Mehmed b. Ahmed nâm kimesne takrîr-i da‘vâ edip müteveffâ-yı mezbûrun zimmetinde alâ tarîki’l-mudârebe dört bin akçe hakkım olup vasiyy-i mezbûrdan da‘vâ ederin dedikde vasiyy-i mezbûr inkâr edip müdde‘îden beyyine taleb olundukda Muslihiddin b. ( ) ve Yusuf b. Musa nâm [kimesne]ler meclis-i şer‘de müteveffâ zimmetinde müdde‘înin dört bin akçe hakkı olduğuna şâhidiz ve şehâdet dahi ederiz dediklerinde meblağ-ı merkūm dört bin akçe müteveffâ-yı mezbûr muhallefâtından hükm olunup Mehmed b. Yusuf ve Mustafa b. Ali nâm muhzır havâle ta‘yîn olundukdan sonra mâ vaka‘a kayd olundu ( ) Şuhûd: Mehmed Bey b. Abdullah el-Bevvâbü’s-sultânî, Mahmud Halîfe b. Muharrem el-İmâm, Yunus b. Abdullah el-Cündî, Said b. Cemal el-Müsta‘id, el-Hâc Ahmed b. Mustafa, Hüseyin b. Hasan, Mustafa b. Ramazan, Hüsrev b. Abdullah, Mustafa b. Ali, Mehmed b. Yusuf
|