|
Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 265 Hüküm no: 329 Orijinal metin no: [48b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Beşe’nin dükkanının el-Hâc Murad’a satıldığı
Mahmiye-i Galata hâricinde vâki‘ Muhyiddin Çelebi mahallesi sâkinlerinden olup bundan akdem vefât eden merhûm Ahmed Beşe b. Abdullah nâm müteveffânın sulbiye kızı Sâliha nâm sagīreye kıbel-i şer‘den vasî nasb olunan Âbide bt. Mehmed nâm hâtun vesâyeten meclis-i şer‘-i şerîfde işbu sâhibü’l-kitâb el-Hâc Murad b. Abdullah nâm kimesne muvâcehesinde takrîr-i kelâm ve ta‘bîr ani’l-merâm edip müteveffâ-yı mezbûrun cümle-i muhallefâtından mahmiye-i mezbûre esvâkından Kürkçükapısı demekle ma‘rûf olan sûkda merhûm ve mağfurun leh Mehmed Paşa vakfı üzre binâ olunan bir tarafı Mehmed Reis b. dükkânı ve bir tarafı Yusuf b. Abdullah dükkânı ve bir tarafı Mehmed Paşa vakfı ve iki tarafı tarîk-i âm ve hâssa müntehî olan bir bâb dükkânı ve mahzeni sûk-ı sultânîde vakf-ı mezbûrun mütevellîsi olan fahrü’l-akrân Keyvan Ağa b. Abdülmennân ma‘rifetiyle zarûret-i deyn ve mezbûreye nafaka için bey‘ men yezîd tarîkiyle mezâd olunup rağabât-ı nâs bi’l-külliyye münkatı‘a oldukdan sonra mezbûr el-Hâc Murad üzerinde dört bin üç yüz akçede karâr edip meblağ-ı merkūm dört bin üç yüz akçeyi mezkûr el-Hâc Murad’dan vesâyetim hasebiyle bi’t-tamâm ve’l-kemâl alıp kabz eyledim ba‘de’l-yevm dükkân-ı mezbûr ve mahzen-i mesfûr mersûm el-Hâc Murad’ın mülk-i müşterâsı olup keyfe mâ yeşâ’ ve yahtâ[r] mutasarrıf ola dedikde mukırra-i merkūmenin vech-i meşrûh üzre olan kelimâtını merkūm el-Hâc Murad bi’l-muvâcehe tasdîk ve bi’l-müşâfehe tahkīk edip mâ hüve’l-vâki‘ alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Ramazâni’l-mübârek min şühûri sene sitte ve elf. Şuhûd: El-Hâc Mustafa b. Hüseyin, el-Hâc Hüseyin b. Maksud, Üstâd Behram b. Abdullah, Keyvan b. Abdullah, Yusuf b. Abdullah, Şaban b. Abdullah, Bekir b. Mehmed, Hasan b. Abdullah, Hüsrev b. Abdullah
|