.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 274
Hüküm no: 343
Orijinal metin no: [50a-3, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan Reis’in Şaban b. Sevindik’i vasî seçtiği

Udûlden Selim Beşe b. Beyce er-Râcil ve Mehmed Reis b. Ali ve Şaban Reis b. Musa ve Mehmed b. Halil ve diğer Şaban b. Musli ve Yakub b. Veli ve Hüseyin b. Yakub nâm kimesneler meclis-i şer‘-i şerîf ve mahfil-i dîn-i münîfe hâzırûn olup, hâl-i hayâtında mahrûse-i Kostantıniyye mahallâtından Gül Câmi‘i mahallesinde sâkin iken bundan akdem İskenderiye’de vefât eden merhûm Hasan Reis b. Süleyman’a borçlu olan Mehmed b. Himmet’in mahzarında, hâmil-i hâze’l-kitâb Şaban b. Sevindik’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezkûr Hasan Reis, zimem-i nâsda bulunan haklarının kabzı ve nehc-i şer‘î üzre sâbit olan kendi üzerindeki borçlarının edâsı için ve dahi Ali ve Mehmed nâm sagīreyn evlâdının emvâlinin hıfzı ve kendilerine irs-i şer‘le intikāl eden emlâkin zabtı için evân-ı rüşd ve zamân-ı bülûğlarına kadar müdde‘î-i mezbûru vasiyy-i muhtâr seçdi. Mezbûr Şaban da vesâyet-i mezkûreyi kabûl edip hizmet-i lâzımesini edâyı müte‘ahhid oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i askerî, şehâdetleri mûcebince müdde‘î-i mezbûrun vesâyetine hükm etti. Cerâ zâlike ve hurrire fî evâsıtı şehri Ramazâni’l-mübârek sene sitte ve elf. Şuhûd: Yusuf Bey b. Abdullah el-Cündî, Şükür b. Mümin, Hasan Çelebi b. Mehmed, Mahmud Reis b. Mehmed, Mustafa Çavuş b. Mehmed, Hüsrev b. Abdullah ve gayruhüm