.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 276
Hüküm no: 346
Orijinal metin no: [50b-2, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ömer b. Mehmed’in Mahmud Halife’de alacağı olduğu

Udûlden Mehmed Bey b. Abdullah ve el-Hâc Hüseyin b. Abdullah nâm kimesneler meclis-i şer‘-i şerîf ve mahfil-i dîn-i münîfe hâzırân olup, hâric-i mahmiye-i Galata mahallâtından Muhyiddin Efendi mahallesinde bundan akdem vefât eden merhûm Mahmud Halîfe b. Şehsüvar’ın oğlu ve vârisi olan Mustafa mahzarında ve merhûm-ı mezbûrun zevcesi ve Osman, Ali ve Âişe ve Rahime nâm evlâd-ı sıgārının kıbel-i şer‘den mansûbe vasîsi olan Mihman Hâtun bt. Sefer mahzarında, Ömer b. Mehmed nâm sagīrin kıbel-i şer‘den mansûb vasîsi olan Hasnâ bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mastûr, hâl-i hayâtı ve kemâl-i akl ve sıhhatinde sagīr-i mezkûra lâzımü’l-edâ ve vâcibü’l-kazâ râyicü’l-vakt bin akçe deyni olduğunu bizim yanımızda ve katımızda ikrâr ve i‘tirâf etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın hâkim-i askerî, şehâdetleri mûcebince meblağ-ı mersûmun müteveffâ-yı merhûmun muhallefâtından sagīr-i merkūma ödenmesine hükm etti. Cerâ zâlike ve hurrire fî evâsıtı şehri Ramazâni’l-mübârek min şühûri sene sitte ve elf.


Şuhûdü’l-hâl: Ömer Çavuş b. Süleyman ve Hüseyin Çelebi b. Muharrem ve İbrahim Çelebi b. Hasan ve’s-sâbikūn