.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 276
Hüküm no: 347
Orijinal metin no: [50b-3, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mahmud Halife’nin evinin borcu nedeniyle karısı Mihman Hatun’a satıldığı

Hâric-i mahmiye-i Galata mahallâtından Muhyiddin Efendi mahallesinde bundan akdem vefât eden merhûm Mahmud Halîfe b. Şehsüvar’ın Osman, Ali, Âişe ve Rahime nâm evlâd-ı sıgārına kıbel-i şer‘den mansûb vasî olan Mahmud Halîfe b. Muharrem ve müteveffâ-yı mezbûrun anası ve vârisi olan Hasnâ bt. Abdullah ve merhûm-ı mezbûrun oğlu ve vârisi olan Mustafa meclis-i şer‘-i şerîf ve mahfil-i dîn-i münîfe hâzırûn olup, müteveffâ-yı mezbûrun muhallefâtından olan, mahalle-i mezkûrede vâki‘ iki beyt-i ulvîyi, iki fevkānî selâmlığı, tahtânî bir beyti, su kuyusunu, helâyı, eşcâr-ı müsmire ve gayr-ı müsmireyi hâvî bahçeyi müştemil olan, bir tarafdan Fâtıma Hâtun bt. Lütfi mülkü, diğer tarafdan Hasan b. Hamza el-Hayyât mülkü, öteki tarafdan Mustafa Reis b. ( ) mülkü, diğer tarafdan da Ensercizâde demekle meşhûr merhûmun vakfı ve tarîk-i hâs ile mahdûd bulunan cemî‘ menzili cümle hudûdu ve kâffe-i hukūku ve tevâbi‘ ve levâhıkıyla râyicü’l-vakt yirmi bin iki yüz akçe semen-i mu‘ayyen-i makbûz ile müteveffâ-yı mersûmun zevcesi hâmiletü hâze’l-kitâb Mihman Hâtun bt. Sefer’e îcâb ve kabûlü hâvî bey‘-i bâtt-ı sahîh ile asâleten ve vesâyeten bey‘ ettiklerini ikrâr ve i‘tirâf ettiler. Mezbûre Mihman Hâtun da kendi malıyla ve kendisi için menzil-i mezbûru onlardan iştirâ etti. Vâki‘ ikrâr, müşteriye-i merkūme tarafından vicâhen ve şifâhen tasdîk edildi. İşbu mübâya‘a, müteveffâ-yı mezbûrun sübût bulmuş deyni sebebiyle menzil-i mezbûrun mecâlis-i tâlibîn ve mehâfil-i râgıbîne bir ay müddetle arz edilip semen-i mezkûrla müşteriye-i merkūme üzerinde karâr kılmasından sonra vukū‘ buldu. Cerâ zâlike ve hurrire fî evâsıtı şehri Ramazâni’l-mübârek sene sitte ve elf.


Şuhûdü’l-hâl: Es-Sâbikūn