.:: İstanbul Kadı Sicilleri ::.


Galata Mahkemesi 20 Numaralı Sicil (H. 1005 - 1007 / M. 1596 - 1599)
cilt: 35, sayfa: 288
Hüküm no: 367
Orijinal metin no: [53a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Miras payının alındığı

Mahmiye-i Galata hâricinde vâki‘ Müeyyedzâde mahallesi sâkinlerinden olup Yahya Beşe b. Abdullah nâm müteveffânın sulbiye kızı Rahime nâm sagīreye kıbeli şer‘den vasî nasb olunan İsmail Çelebi b. Mahmud nâm kimesne meclis-i şer‘-i şerîfde işbu sâhibü’l-kitâb Yunus Beşe b. Abdullah nâm râcil muvâcehesinde takrîr-i kelâm ve ta‘bîr ani’l-merâm edip târih-i kitâbdan bir yıl üç aydır ki vasîsi olduğum mezbûre Rahime’nin babasından irs-i şer‘le intikāl eden on dört kovanı ve bir öküzü bin dört yüz akçe bahâya tutulan buğdayı ve üç kaz ve beş tavuk ve bir anbarı bey‘ edip mezbûre sagīrenin hisse-i şayi‘asını edâya mersûm Yunus Beşe’yi vekîl etmiş idim el-hâletü hâzihî sagīre-i mersûme Rahime’ye intikāl eden hisse-i şer‘iyyesini vesâyetim hasebiyle mezbûr Yunus Beşe yedinden bi’t-tamâm ve’l-kemâl alıp kabz eyledim mukırr-ı merkūmun vech-i meşrûh üzre olan kelimâtını mezkûr Yunus Beşe bi’l-muvâcehe tasdîk ettikden sonra mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâili şehri Şevvâli’l-mükerrem sene sitte ve elf. Şuhûd: Ahmed b. el-Hâc Ramazan el-Müezzin, Hızır b. Murtaza el-İmâm, Hasan b. Abdullah, Hüsrev b. Abdullah, Mehmed b. Derviş