Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 293 Hüküm no: 375 Orijinal metin no: [54a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Bey’in Macar asıllı iki câriyesini vasiyet yoluyla azat ettiği Mahmiye-i Galata hâricinde vâki‘ Fazlullah Efendi mahallesi sâkinlerinden fahrü’l-akrân Sefer Bey b. İsmail nâm cündî meclis-i şer‘-i şerîf-i lâzımü’t-tevkīrde işbu sâhibetü’l-kitâb orta boylu çatık kaşlı kara gözlü kara yağız başında kellik eseri olup Macariyyetü’l-asl Gülşen bt. Abdullah nâm câriye-i memlûkü mahzarında takrîr-i kelâm ve ta‘bîr ani’l-merâm edip mevsûfe-i mezkûre câriyemi işbu câ-yı mihnetden civâr-ı rabb-i izzete intikāl eylemezden kırk gün evvel cümle malımdan âzâd olmak üzre müdebbere eyledim ve dâr-ı dünyâdan dâr-ı ukbâya intikāl eyleyip müddet-i mezbûre tamâm mevcûde ola câriye-i mevsûfe cümle malımdan âzâd olup sâir harâir-i asliyyât gibi hürre olsun âhirete nakl eylediğimden sonra mezkûre câriyeye sülüs-i mâlımdan beş bin akçe verilip kendi masrafına sarf eyleye deyû ikrâr ve i‘tirâf eylediğinde mukırr-ı merkūmun vech-i meşrûh üzre olan kelimâtını mukarrun lehe’l-mesfûre vicâhen tasdîk ve şifâhen tahkīk eyledikden sonra yine merkūm Sefer Bey meclis-i şer‘-i şerîf-i lâzımü’l-hatîrde işbu sagīre açık kaşlı elâ gözlü sarışın sağ kaşında eser-i cerâhati olup Macariyyetü’l-asl Esma bt. Abdullah nâm câriye-i memlûkü mahzarında takrîr-i kelâm edip mevsûfe-i mezkûre câriyemi tedbîr-i mutlak ile müdebbere eyledim kavs-ı kazâdan tîr-i ecel nâzil bi irâdeti’llâhi’l-meliki’l-müte‘âl işbu câ-yı mihnetden civâr-ı rabb-i izzete intikāl eylediğimden sonra on beş yaşına varınca karındaşım Asil Bey b. İsmail ve hemşîrem Selime bt. İsmail’e hizmet ede ve mezkûre Esma’ya dahi ba‘de’l-vefât sülüs-i mâlımdan on bin akçe verilip mezkûre Esma lâzım olan masrafına sarf eyleye deyû bi’t-tav‘ ve’r-rızâ ikrâr ve i‘tirâf eylediğinden sonra mukırr-ı merkūmun vech-i meşrûh üzre olan kelimâtını mukarrun lehe’l-mersûme vicâhen tasdîk ve hizmet-i lâzımesine kıyâmı müte‘ahhide olup mâ hüve’l-vâki‘ alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fî evâsıtı şehri Şevvâli’l-mükerrem li sene sitte ve elf. Şuhûd: El-Hâc Hasan b. Mehmed, Pîr Ahmed b. Memi, el-Hâc Hasan b. Abdullah, Ali b. Nasuh, el-Hâc İlyas b. Derviş, Mehmed b. Murad, el-Hâc Abdi b. Murad, Ali b. Erdoğdu, Hüsrev b. Abdullah el-Muhzır ve gayruhüm