Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 298 Hüküm no: 382 Orijinal metin no: [55a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ Hatun’un kocası Mustafa Reis’te ödünçten alacağı olduğu Udûlden Hasan Beşe b. Abdullah ve Receb Reis b. Ali nâm kimesneler meclis-i şer‘-i şerîfe hâzırân olup, hâric-i mahrûse-i Galata mahallâtından Sarı Lütfi mahallesinde bundan akdem vefât eden Mustafa Reis b. Abdullah’ın kızı ve vârisi olan Sâliha tarafından husûs-ı âti’z-zikre vekâleti bimâ hüve tarîkü’s-sübût şer‘an sâbit olan Bayram Reis b. Ali mahzarında ve yine merhûm-ı mezbûrun kızı ve vârisi olan Fâtıma nâm hâtun mahzarında ve yine merhûm-ı mersûmun zevcesi ve vârisi olan Usul Hâcce bt. Abdullah nâm hâtun kıbelinden husûs-ı âti’z-zikre vekîl edilen Bâli b. Derviş mahzarında, müteveffâ-yı mezkûrun zevcesi hâmiletü hâze’l-kitâb Hümâ Hâtun bt. Cafer’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezkûrenin, müteveffâ-yı merkūmun zimmetinde, karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt bin altı yüz akçe hakkı vardır. Müdde‘iye-i mezkûre, meblağ-ı merkūmu küllen veya ba‘zan müteveffâ-yı mezbûrdan veya vekîlinden aslâ ahz ü kabz etmediğine yemîn billâh ettiğinde ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber oldukda, hâkim-i askerî şehâdetleri mûcebince meblağ-ı mersûmun, müteveffâ-yı merhûmun muhallefâtından müdde‘iye-i mesfûreye ödenmesine hükm etti. Cerâ zâlike ve hurrire fî evâhiri şehri Şevvâli’l-mükerrem sene sitte ve elf. Şuhûd: Es-Sâbikūn