Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 298 Hüküm no: 383 Orijinal metin no: [55a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis’in evini oğulluğu Bayram Reis’e sattığı Mahmiye-i Galata hâricinde vâki‘ Sarı Lütfi mahallesi sâkinlerinden olup bundan akdem vefât eden merhûm Mustafa Reis b. Abdullah nâm müteveffânın sulbiye kızı Fâtıma nâm hâtun asâleten ve müteveffâ-yı mezbûrun zevce-i metrûkesi olan Usul Hâcce bt. Abdullah nâm hâtun tarafından da‘vâya ve irs-i şer‘le intikāl eden sümün hissesini kabza vekîl olup vekâleti bimâ hüve tarîkü’s-sübût şer‘an sâbite olan Bâli b. Derviş vekâleten meclis-i şer‘-i şerîf-i lâzımü’t-tevkīrde işbu bâ‘isü’l-kitâb merhûm-ı mezkûrun oğulluğu Bayram Reis b. Ali nâm kimesne muvâcehesinde takrîr-i da‘vâ edip müteveffâ-yı mersûmun mahalle-i mezkûrede vâki‘ inde’l-ahâlî ve’l-cîrân ma‘lûmetü’l-hudûd olan menzilini sâir muhallefâtına idhâl edip beyne’l-verese tevzî‘ ve taksîm olmasına mezbûr Bayram Reis mâni‘ olur suâl olunup mûcebin taleb ederiz dediklerinde gıbbe’s-suâl menzil-i mezbûru sene dokuz yüz doksan beş Rebî‘ulâhirinde babalığım merkūm Mustafa Reis’den ( ) akçeye bey‘ edip hâlen mülk-i müşterâmdır kaziyye minvâl-i meşrûh üzre olduğuna dahi yedimde hüccet-i şer‘iyyem vardır deyû cevâb verip fi’l-hakīka yedinde olan hüccete nazar olunup kelâmına mutâbık ve makāline muvâfık bulundukda müdde‘iyân-ı mersûmân hüccet-i mezbûra alâ tarîki’l-muvâza‘adır dediklerinde müdde‘iyân-ı mesfûrândan menzil-i mezkûr hâlen merhûm-ı merkūmun mülkü olduğuna beyyine taleb olundukda beyyineden âcizler olup müdde‘â aleyhe menzil-i mezkûru ( ) akçeye bey‘ edip meblağ-ı merkūm ( ) akçeyi hâl-i hayâtında merhûm Mustafa Reis’e bi’t-tamâm ve’l-kemâl teslîm eylediğine istihlâf olunsun dediklerinde mesfûr Bayram Reis dahi minvâl-i meşrûh üzre yemîn billâhi’l-aliyyi’l-azîm eyledikden sonra menzil-i mersûm mastûr Bayram Reis’in mülk-i müşterâsı idiğine hükm olunup mâ vaka‘a alâ vukū‘ihî ketb olunup yed-i tâlibe def‘ olundu ki vakt-i hâcetde mübeyyin-i hâl ola. Hurrire fi’t-târihi’l-mezbûr. Şuhûdü’l-hâl: Musa Bey b. Abdullah el-Cündî, Mehmed b. Hasan, Abdi Reis b. Mehmed, Mustafa Bey b. Abdullah el-Cündî, Hüseyin b. Kasım, Hasan Beşe b. Abdullah el-Münâdî, Pîrî b. Abdünnebi, Mehmed b. Mustafa, Ali Bey b. Ramazan Derkenâr 1: Tekrâr Derkenâr 2: Sûret-i da‘vâ âhar üslûb üzre tahrîr olunup tekrâr yazılması lâzım gelmeğin bu kâğıdın zahrında olan üçüncü hüccet budur.