Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 299 Hüküm no: 384 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis’in vârislerinin miras ihtilafında sulh oldukları Mahmiye-i Galata hâricinde vâki‘ Sarı Lütfi mahallesi sâkinlerinden olup bundan akdem vefât eden merhûm Mustafa Reis b. Abdullah nâm müteveffânın sulbiye kızı Fâtıma Hâtun asâleten meclis-i şer‘-i şerîf-i lâzımü’t-tevkīrde işbu hâmiletey hâze’l-kitâb müteveffâ-yı mezbûrun zevce-i metrûkesi olan Hümâ Hâtun bt. Cafer ve merhûm-ı mezkûrun diğer sulbiye kızı Sâliha nâm Hâtun taraflarından husûs-ı âti’z-zikre bimâ hüve tarîk-i sübût şer‘an vekâleti sâbite olan Bayram Reis b. Ali nâm kimesne muvâcehesinde takrîr-i kelâm ve ta‘bîr ani’l-merâm edip müteveffâ-yı mersûmun muhallefâtı husûsunda zevce-i metrûkesi mesfûre Hümâ ve diğer kızı Sâliha nâm hâtunlar ile mâbeynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî merkūmetân Hümâ ve Sâliha ile merhûm-ı mezbûrun esbâbı ve menzili ve gayrı cümle muhallefâtı husûsunda olan üç bin iki yüz yirmi akçe hisse-i şer‘iyyemi vekîl-i mastûr Bayram Reis yedinden bi’t-tamâm ve’l-kemâl alıp kabz edip zimmetlerini ibrâ-i âm ile ibrâ ve iskāt-ı tâm ile iskāt eyleyip da‘vâ ve nizâ‘ım kalmadı ba‘de’l-yevm husûs-ı mezbûra müte‘allik bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırra-i merkūmenin vech-i meşrûh üzre olan kelimâtını vekîl-i mersûm Bayram Reis bi’l-muvâcehe tasdîk ve bi’l-müşâfehe tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb olunup yed-i tâlibe def‘ olundu ki vakt-i hâcetde mübeyyin-i hâl ola. Tahrîren fi’t-târihi’l-mezbûr. Şuhûd: Es-Sâbikūn fi’l-varaki’s-sâbık