Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 300 Hüküm no: 385 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hümâ bt. Cafer’in kocası Mustafa Reis’te mehir alacağı olduğu Mahmiye-i Galata hâricinde vâki‘ Sarı Lütfi mahallesi sâkinlerinden olup bundan akdem vefât eden merhûm Mustafa Reis b. Abdullah nâm müteveffânın zevce-i metrûkesi olan Hümâ bt. Cafer nâm hâtunun husûs-ı âti’z-zikri da‘vâya bimâ hüve tarîk-i sübût şer‘an vekâleti sâbite olan Bayram Reis b. Ali nâm kimesne mahfil-i kazâda müteveffâ-yı mezbûrun sulbiye kızı olan Fâtıma nâm hâtun ve diğer zevce-i metrûkesi olan Usul Hâcce bt. Abdullah nâm hâtun tarafından husûs-ı âti’z-zikre şer‘an vekâleti sâbite olan Bâli b. Derviş nâm kimesne muvâcehesinde takrîr-i da‘vâ edip merhûm-ı mezbûrun zimmetinde mehr-i müeccelimden iki bin akçe vardır suâl olunup muhallefâtından taleb ederim dedikde gıbbe’s-suâl ve’l-inkâr müdde‘iye-i mezbûreden beyyine taleb olunup beyyineden âcize oldukda mehr-i müeccelinden meblağ-ı mersûm iki bin akçe hakkı olduğuna yemîn billâh eylesin dediklerinde mezkûre Hümâ dahi mehr-i müeccelinden iki bin akçe merhûm Mustafa Reis’in zimmetinde hakkı olup meblağ-ı merkūm iki bin akçe mehrinden bir akçe hibe ve kabz etmediğine yemîn billâhi’l-aliyyi’l-azîm ettiğinde meblağ-ı mersûm iki bin akçeyi merhûm-ı mezbûrun muhallefâtından edâsına hükm olunup mâ hüve’l-vâki‘ alâ vukū‘ihî ketb ve terkīm olunup yed-i tâlibe def‘ olundu ki vakt-i hâcetde mübeyyin-i hâl ola. Tahrîren fi’t-târihi’l-mezbûr. Şuhûd: Derviş Halîfe b. Mehmed el-İmâm, Receb Reis b. Ali ve es-Sâbikūn fi’l-varaki’s-sâbık