Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 301 Hüküm no: 386 Orijinal metin no: [55b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Reis’in evini oğulluğu Bayram Reis’e sattığı Mahmiye-i Galata hâricinde vâki‘ Sarı Lütfi mahallesi sâkinlerinden olup bundan akdem merhûm Mustafa Reis b. Abdullah nâm müteveffânın sulbiye kızı Fâtıma nâm hâtun asâleten ve müteveffâ-yı mezbûrun zevce-i metrûkesi olan Usul Hâcce bt. Abdullah nâm hâtun tarafından da‘vâya ve irs-i şer‘le intikāl eden sümün hissesini kabza vekîl olup vekâleti bimâ hüve tarîki sübûtihî şer‘an sâbite olan Bâli b. Derviş vekâleten meclis-i şer‘-i şerîf-i lâzımü’t-tevkīrde işbu bâ‘isü’l-kitâb merhûm-ı mezkûrun oğulluğu Bayram Reis b. Ali nâm kimesne muvâcehesinde takrîr-i da‘vâ edip müteveffâ-yı mersûmun mahalle-i mezkûrede vâki‘ inde’l-ahâlî ve’l-cîrân ma‘lûmetü’l-hudûd olan menzili sâir muhallefâtına idhâl edip beyne’l-verese tevzî‘ ve taksîm olunmasına mezbûr Bayram Reis mâni‘ olur suâl olunup mûcibin taleb ederiz dediklerinde gıbbe’s-suâl menzil-i mezbûr babamız olup bundan akdem vefât eden merhûm Ali’den irs-i şer‘le bana ve karındaşım Hasan Reis’e intikāl etmişdir. Karındaşım mezbûr Hasan Reis ile ber vech-i iştirâk mutasarrıf üzre iken menzil-i mezbûrun nısf hissesini karındaşım Hasan Reis bana sene dokuz yüz doksan beş Rebî‘ulâhirinde on bin akçeye şirâ edip hâlen mülk-i müşterâmdır, merhûm Mustafa Reis’in kat‘an alâkası yoktur, kaziyye minvâl-i meşrûh üzre olduğuna yedimde hüccet-i şer‘iyyem dahi vardır deyû cevâb verip fi’l-hakīka yedinde olan hüccete nazar olunup kelâmına mutâbık ve makāline muvâfık bulundukda müdde‘iyân-ı mersûmândan menzil-i mezkûr merhûm Mustafa Reis’in mülk-i müşterâsı idiğine beyyine taleb olundukda beyyineden âcizler olup müdde‘â aleyhe menzil-i mezkûr merhûm Mustafa Reis’e bey‘ eylemediğine ve bey‘ ederim deyû mukābelede birkaç akçe almadığına istihlâf olunsun dediklerinde mesfûr Bayram Reis dahi minvâl-i meşrûh üzre yemîn billâhi’l-aliyyi’l-azîm eyledikden sonra menzil-i mersûm Bayram Reis’in mülkü olup merhûm Mustafa Reis’in alâkası olmadığına hükm olunup mâ vaka‘a alâ vukū‘ihî gıbbe’t-taleb tahrîr olunup yed-i tâlibe def‘ olundu ki vakt-i hâcetde mübeyyin-i hâl ola. Tahrîren fî evâhiri min Şevvâli’l-mükerrem sene sitte ve elf. Şuhûd: Musa Bey b. Abdullah el-Cündî, Mehmed b. Hasan, Abdi Reis b. Mehmed, Hüseyin b. Kasım, Ali Reis b. Ramazan, Pîrî b. Abdünnebi, Mehmed b. Mustafa, Mustafa Bey b. Abdullah el-Cündî, Hüseyin Beşe b. Abdullah el-Münâdî, Hüsrev b. Abdullah el-Muhzır ve gayruhüm mine’l-hâzırîn