Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 312 Hüküm no: 405 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Yahya Beşe adlı çocuğun eski ve yeni vasîlerinin bal satışı davasında sulh oldukları Mahmiye-i Galata hâricinde vâki‘ Müeyyedzâde mahallesi sâkinlerinden olup bundan akdem vefât eden merhûm Yahya Beşe b. Abdullah nâm müteveffânın sulbiye kızı Havva nâm sagīreye kıbel-i şer‘den vasî nasb olunan Cinâne bt. Hasan nâm hâtun meclis-i şer‘-i şerîf-i lâzımü’t-tevkīrde işbu hâmilü’l-kitâb bundan akdem sagīre-i mezbûre Havva’ya vasî olup ma‘zûl olan Yunus Beşe b. Abdullah nâm râcil muvâcehesinde takrîr-i da‘vâ edip mersûm Yunus Beşe sagīre-i mesfûre Havva’ya babası merhûm Yahya Beşe’den irs-i şer‘le intikāl eden hissesinden mahrûse-i Üsküdar kazâsına tâbi‘ Kalburcu demekle ma‘rûf karyede olan on dört kıt‘a kovanını Mustafa Beşe b. Abdullah nâm râcile bin akçeye bi gayrı vesâyetihî gabn-i fâhiş ile bey‘ eylemiş hâlen vesâyetim hasebiyle suâl olunup mûcebini taleb ederin dedikde gıbbe’s-suâl mezkûr Yunus Beşe vesâyetden ma‘zûl olduğumdan sonra vasiyye-i mezbûre Cinâne Hâtun husûs-ı mersûmeyi bey‘a ve semenini kabz ve îsâle beni vekîl edip vekâletim hasebiyle zikr olunan on dört kıt‘a kovanı merkūm Mustafa Beşe’ye bin akçeye bey‘ eylemişdir deyû cevâb verdikde mastûre Cinâne Hâtun vekâlet-i mersûmeyi münkire olup mezkûr Yunus Beşe minvâl-i meşrûh üzre vekîl olduğunu isbât eylesin deyip mezbûr Yunus Beşe dahi vech-i meşrûh üzre vekîl eylediğini isbâtdan âciz olmağla mâbeyne muslihûn tavassut edip zikr olunan on dört kıt‘a kovandan beş kovana sulh edip bedel-i sulh olan beş pâre kovanı vesâyetim hasebiyle alıp kabz edip husûs-ı mezbûra müte‘allik da‘vâ ve nizâ‘dan merkūm Yunus Beşe ve müşterî-i mezkûr Mustafa Beşe’nin zimmetlerini ibrâ ve iskāt eyledim ba‘de’l-yevm husûs-ı mezkûra müte‘allik bi’z-zât ve bi’l-vâsıta benden da‘vâ ve taleb zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırra-i mezbûrenin vech-i meşrûh üzre olan kelimâtını mersûm Yunus Beşe ve Mustafa Beşe bi’l-muvâcehe tasdîk ve bi’l-müşâfehe tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî kayd olundu. Tahrîren fi’t-târihi’l-mezbûr. Şuhûd: Ali Çelebi b. el-Hatîb, Ahmed Halîfe b. Şaban el-Müezzin, Mehmed Beşe b. Abdullah er-Râcil, Yusuf b. Mehmed, Yunus Reis b. Abdullah, Mustafa (…), Hüsrev b. Abdullah, Mehmed b. Yusuf