Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 313 Hüküm no: 406 Orijinal metin no: [58b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havva bt. Yahya Beşe adlı çocuğun eski ve yeni vasîlerinin bal satışı davasında sulh oldukları Mahmiye-i Galata hâricinde vâki‘ Müeyyedzâde mahallesi sâkinlerinden olup vefât eden merhûm Yahya Beşe b. Abdullah nâm müteveffânın sulbiye kızı Havva nâm sagīreye bundan akdem kıbel-i şer‘den vasî olup ma‘zûl olan Yunus Beşe b. Abdullah nâm râcil meclis-i şer‘-i şerîf-i lâzımü’t-tevkīrde işbu sâhibetü’l-kitâb hâlen sagīre-i mezkûrenin kıbel-i şer‘den vasîsi olan vâlidesi Cinâne bt. Hasan nâm hâtun muvâcehesinde takrîr-i kelâm ve ta‘bîr ani’l-merâm edip sagīre-i merkūme Havva’ya babası merhûm Yahya Beşe’den irs-i şer‘le intikāl eden hissesinden mahrûse-i Üsküdar kazâsına tâbi‘ Kalburcu demekle ma‘rûf karyede olan on dört kıt‘a kovanını Mustafa Beşe b. Abdullah nâm râcile bin akçeye bey‘ eylemiş idim hâlen vasiyye-i mezbûre Cinâne Hâtun zikr olunan on dört kıt‘a kovanı gabn-i fâhiş ile bey‘ eylemişsin bey‘-i mersûm makbûlüm değildir deyû beynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî mâbeynimize muslihûn tavassut edip zikr olunan on dört kıt‘a kovandan beş kıt‘a kovana sulh edip bedel-i sulh olan beş kıt‘a kovanı vesâyetim hasebiyle alıp kabz edip husûs-ı mezbûra müte‘allik mâbeynimizi ibrâ ve iskāt eyledik dedikde mukırr-ı merkūmun vech-i meşrûh üzre olan kelimâtını merkūme Cinâne Hâtun vicâhen tasdîk ve şifâhen tahkīk edip tarafeynden sâdır ve bâhir olan ikrâr ve tasdîk mûcebince sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb olunup yed-i tâlibe vaz‘ olundu ki vakt-i hâcetde mübeyyin-i hâl ola. Tahrîren fi’t-târihi’l-mezbûr. Şuhûd: Es-Sâbikūn